مينيستر بالايەۆا جۋرناليست اقجولوۆاعا پرەزيدەنتتىڭ حاتىن جەتكىزدى.
الماتى وبلىسىنىڭ تۋماسى، قازاقستانعا ەڭبەگى سىڭگەن مادەنيەت قايراتكەرى، ارداگەر جۋرناليست ءحانىمبۇبى اقجولوۆا 100 جاسقا تولدى، دەپ حابارلايدى Almaty-akshamy.kz.
23 شىلدەدە الماتى قالاسىنداعى «دوستىق ۇيىندە» اقپارات جانە قوعامدىق دامۋ ءمينيسترى ايدا بالايەۆا قازاقستاننىڭ ەڭبەك سىڭىرگەن مادەنيەت قايراتكەرى، ارداگەر جۋرناليست ءحانىمبۇبى اقجولوۆانىڭ 100 جاسقا تولۋىنا بايلانىستى مەرەيتوي يەسىنە مەملەكەت باسشىسى قاسىم-جومارت توقايەۆتىڭ ارنايى العىس حاتىن تابىستادى.
«ءسىز عيبراتتى عۇمىر جولىڭىزدىڭ بۇگىنگى ءبىر عاسىرلىق بەلەسىنە ۇلكەنگە دە، جاسقا دا ۇلگى بولاتىن ادامي بيىك بولمىسىڭىزبەن جەتىپ وتىرسىز. وتاندىق باسپا ءسوز سالاسىندا كوپ جىل قاجىرلى قىزمەت ەتىپ، ەلىمىزدىڭ بۇقارالىق اقپارات قۇرالدارىن دامىتۋعا وراسان زور ەڭبەك ءسىڭىردىڭىز. ەل يگىلىگى ءۇشىن اتقارعان جەمىستى جۇمىسىڭىز ءۇشىن سىزگە العىسىمدى ءبىلدىرىپ، 100 جاسقا تولعان مەرەيتويىڭىزبەن شىن جۇرەكتەن قۇتتىقتايمىن. دەنىڭىزگە ساۋلىق، اۋلەتىڭىزگە اماندىق تىلەيمىن»، – دەلىنگەن العىس حاتتا.
ارداگەر جۋرناليست 1949 جىلى ءبىلىم ورداسىن قىزىل ديپلوممەن ءتامامداپ، «سوسياليستىك قازاقستان» («ەگەمەن قازاقستان») رەسپۋبليكالىق گازەتىندە ۇزاق جىلدار بويى قىزمەت اتقارعان. كەيىننەن تۋعان جەرىنە ورالىپ، جامبىل اۋداندىق «بولشيەۆيكتىك جول» («ەكپىندى ەڭبەك») گازەتىنە رەداكتور بولىپ تاعايىندالىپ، قاجىرلى ەڭبەك ەتەدى. 1971 جىلى زەينەت جاسىنا جەتىپ، «قازاقستانعا ەڭبەگى سىڭگەن مادەنيەت قايراتكەرى» قۇرمەتتى اتاعىن يەلەنگەن. الماتى وبلىسىنىڭ قۇرمەتتى ازاماتى.
«ءسىز بۇكىل سانالى عۇمىرىڭىزدى قازاق جۋرناليستيكاسىنىڭ دامۋىنا ارنادىڭىز. سوندىقتان ءوزىڭىزدىڭ ءتول سالاڭىز – باسپا ءسوز زامانمەن بىرگە وسىپ-وركەندەپ، ءوز ورنىن جوعالتپاي كەلەدى. مۇنىڭ ءوزى ەڭ الدىمەن وزىڭىزدەي ارداگەر-جۋرناليستەر سالعان سارا جولدىڭ جەمىستى جالعاسى ەكەنى داۋسىز. سوندىقتان بۇگىنگى مەرەيتويىڭىز - اۋلەتىڭىزدىڭ عانا ەمەس، ءبىزدىڭ ۇلتتىق جۋرناليستيكانىڭ ورتاق قۋانىشى»، - دەدى مينيستر ايدا بالايەۆا قۇتتىقتاۋ بارىسىندا.
