12 مىڭنان استام قازاقستاندىق داۋىس بەرەدى.
سىرتقى ىستەر مينيسترلىگى ق ر پرەزيدەنتى سايلاۋىندا ەلىمىزدىڭ شەت ەلدەردەگى مەكەمەلەرى جانىنداعى سايلاۋ ۋچاسكەلەرىنىڭ قىزمەتىن قامتاماسىز ەتۋ بويىنشا جۇمىستار جالعاسۋدا، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الەمنىڭ 53 ەلىندەگى 68 سايلاۋ ۋچاسكەسىندە 12 مىڭنان استام قازاقستاندىق داۋىس بەرەدى دەپ جوسپارلاپ وتىرمىز. شەتەلدە داۋىس بەرۋ پروسەسىن ۋاقتىلى جانە تولىققاندى دايىنداۋ ءۇشىن قازاقستان ازاماتتارىنان جاقىن ماڭداعى سايلاۋ ۋچاسكەسىنە الدىن الا حابارلاسۋدى جانە سايلاۋشىلار تىزىمىنە ەنگىزۋ ءۇشىن دەرەكتەردى ۇسىنۋدى سۇرايمىز»، - دەپ اتاپ ءوتتى ايبەك سمادياروۆ.
ونىڭ مالىمدەۋىنشە، شەت ەلدەردەگى سايلاۋ ۋچاسكەلەرىندە داۋىس بەرۋ 20 قاراشا، جەكسەنبى كۇنى جەرگىلىكتى ۋاقىت بويىنشا 07:00-20:00 ارالىعىندا وتەدى.
سونىمەن قاتار، ول بيىلعى كەزەكتەن تىس ق ر پرەزيدەنتى سايلاۋىندا ۋكرايناداعى سايلاۋ ۋچاسكەلەرى جۇمىس ىستەمەيتىنىن اتاپ ءوتتى.
ايبەك سمادياروۆتىڭ دەرەگىنشە، بۇل شەشىم اتالعان ەلدەگى جاعدايعا بايلانىستى قابىلدانعان. سوندىقتان سايلاۋعا قاتىسۋعا نيەتتى قازاقستاندىقتار مولدوۆا نەمەسە پولشاعا بارىپ داۋىس بەرە الادى.