قوزعالىس قاتارىنا ءار ايماقتان ءارتۇرلى ۇيىم كىرە الادى.
پرەزيدەنت سايلاۋى قارساڭىندا تاۋەلسىز «باقىلا» قوعامدىق قوزعالىسى قۇرىلدى، دەپ حابارلايدى Almaty-akshamy.kz Almaty.tv سىلتەمە جاساپ.
بەلگىلى ساياساتتانۋشىلار مەن قوعام بەلسەندىلەرىنەن قۇرىلعان ۇيىم تاۋەلسىز باقىلاۋشىلاردى وقىتىپ، سايلاۋعا دايىندايدى. وقىتۋ كۋرسى بۇكىل ەل اۋماعىندا، ياعني 20-دان استام قالادا وفلاين جانە ونلاين تۇردە وتەدى. دارىستە سايلاۋ پروسەسىنىڭ بۇگە-شۇگەسى ءتۇسىندىرىلىپ، قۇقىقتىق ءبىلىم بەرىلەدى. ساباق الەۋمەتتىك جەلىلەرگە جۇكتەلىپ، تەگىن تاراتىلادى.
«ەڭ باستى ماقساتىمىز – ازاماتتاردىڭ داۋىسىنىڭ بۇرمالانىپ كەتپەۋىن، ۇرلانباۋىن، قوقىس جاشىگىندە جاتپاۋىن، بيۋللەتەندەردى ىسىراپ ەتپەۋدى قاداعالاۋ. بۇل – ءبىر. سايلاۋ ۋچاسكەلەرىنە قانشا ازامات قاتىستى، زاڭ بۇزۋشىلىق بولعان جوق پا، باقىلاۋشىلارعا قىسىم جاسالدى ما؟ ەكىنشىدەن، ماقسات – باقىلاۋشىنىڭ قۇقىعىن قورعاۋ»، – دەدى ساياساتتانۋشى، Baqyla قوعامدىق قوزعالىسىنىڭ ۇيىمداستىرۋشىسى اسحات قاسەنعالي.
قوزعالىس قاتارىنا ءار ايماقتان ءارتۇرلى ۇيىم كىرە الادى. ساياسي ناۋقان تۋرالى ءبىلىمىن جەتىلدىرگىسى كەلەتىن تاۋەلسىز باقىلاۋشىلار 18 جاسقا تولعان جانە ەشقانداي پارتياعا مۇشە بولماۋى كەرەك. جالپى، باستاماشى توپ ەلىمىزدە 10 مىڭنان اسا سايلاۋ ۋچاسكەسى بولادى دەپ توپشىلاسا، سونىڭ 3 مىڭىن ساپالى، ساۋاتتى باقىلاۋشىلارمەن قامتۋدى كوزدەپ وتىر.
«قوعامىمىز بۇل سايلاۋدىڭ اشىق، ءادىل ءارى ليگيتيمدى وتكەنىن قالايدى. سوندىقتان بىرنەشە ازامات بولىپ بىرىگىپ، بۇل پروسەستىڭ زاڭدى وتۋىنە اتسالىسۋدى ءجون كوردىك. باقىلاۋشىلاردى ونلاين وقىتامىز. ءبىزدىڭ قىزمەتىمىز سايلاۋ اياقتالعان كۇنى بىتەدى»، – دەدى جۋرناليست، پۋبليسيست بيگەلدى عابدۋللين.