«استانا» حالىقارالىق قارجى ورتالىعىنىڭ باسشىسى رەنات بەكتۇروۆ احقو-نىڭ بىلتىرعى جانە بيىلعى I توقساندا اتقارعان جۇمىسىنىڭ ناتيجەلەرى بايانداپ، ورتالىقتى دامىتۋ جوسپارىمەن تانىستىردى، دەپ حابارلايدى اlmaty-akshamy.kz.
قارجى ورتالىعى ىسكە قوسىلعان ساتتەن بەرى ەلىمىزگە 11 ميلليارد دوللاردان استام (2023 جىلعى جانە وسى جىلدىڭ العاشقى 3 ايىنداعى 3،5 ميلليارد دوللار قارجىنى قوسا العاندا) ينۆەستيسيا تارتۋعا اتسالىسقان.
بۇل 2025 جىلعا الدىن الا بەلگىلەنگەن ماقساتتى كورسەتكىشتەن اسقان.
وتكەن جىلى احقو-دا تىركەلگەن كومپانيالاردىڭ سانى 670-تەن (جالپى الەمنىڭ 78 ەلىنەن 2600-دەن اسا كومپانيا) اسقانى جونىندە مالىمەت بەرىلدى. بۇل — رەكوردتىق كورسەتكىش.
بىلتىر جانە وسى جىلدىڭ العاشقى ءۇش ايىندا ورتالىق قاتىسۋشىلارى مەملەكەت بيۋدجەتىنە 48،7 ميلليارد تەڭگە سالىق تولەگەن.
داۋلاردى شەشۋدە احقو سوتى مەن حالىقارالىق اربيتراج ورتالىعى سياقتى ينستيتۋتتار تابىستى جۇمىس ىستەپ جاتىر. 2023 جىلى 767 كوممەرسيالىق ءىس قارالعان.
پرەزيدەنت قارجى ورتالىعىن ودان ءارى دامىتۋعا قاتىستى ءبىرقاتار وزەكتى مىندەتتى ايقىنداپ بەردى. اتاپ ايتقاندا، احقو-نىڭ ءوڭىر ءۇشىن جاسىل قور تارتۋ جانە ورتا ءدالىزدى دامىتۋ ىسىندەگى رولىنە توقتالدى.
ەلىمىزدەگى «جاسىل» وبليگاسيالار مەن كرەديتتەردىڭ 60 پايىزدان استامى احقو جاسىل قارجى ورتالىعىنىڭ قولداۋىمەن بەرىلدى.
قارجى ورتالىعىنىڭ يۋريسديكسياسىندا ورتا ءدالىز جوباسى اياسىندا بىرلەسكەن كاسىپورىندار جۇمىس ىستەپ جاتىر.
قاسىم-جومارت توقايەۆ قازىرگى جاعدايدا مامىلەلەر جاساۋ ءۇشىن احقو ينفراقۇرىلىمىن بەلسەندى پايدالانا وتىرىپ، قازاقستان ەكونوميكاسىنا ينۆەستيسيا تارتۋعا كومەكتەسەتىن بارلىق مەملەكەتتىك ورگان مەن وعان جەتەكشىلىك ەتەتىن قارجى ينستيتۋتتارىنىڭ كۇش-جىگەرىن بىرىكتىرۋ قاجەت ەكەنىنە نازار اۋداردى.