پرەزيدەنت قازۇۋ رەكتورى جانسەيىت تۇيمەبايەۆتى قابىلدادى

قازۇۋ-دا 24 مىڭنان استام ستۋدەنت ءبىلىم الۋدا.

كەزدەسۋ بارىسىندا مەملەكەت باسشىسىنا ۋنيۆەرسيتەتتىڭ اكادەميالىق، عىلىمي-زەرتتەۋ، يننوۆاسيالىق قىزمەتىنىڭ ناتيجەلەرى جانە وقۋ ورنىن دامىتۋدىڭ جاڭا باعىتتارى مەن پەرسپەكتيۆالارى باياندالدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ. 

جانسەيىت تۇيمەبايەۆتىڭ ايتۋىنشا، بۇگىندە ۋنيۆەرسيتەتتە 24 مىڭنان استام ستۋدەنت، سونىڭ ىشىندە الەمنىڭ 54 ەلىنەن 2،8 مىڭ شەتەلدىك ازامات ءبىلىم الادى. 542 ءبىلىم بەرۋ باعدارلاماسى جۇزەگە اسىرىلىپ جاتىر، عىلىمي ورتالىقتار مەن عىلىمي جوبالار سانى ارتقان. 2022 جىلى اقش، ۇلىبريتانيا، جاپونيا، فرانسيا، ءباا جانە تۇركيانىڭ جەتەكشى ۋنيۆەرسيتەتتەرىمەن 30-دان استام كەلىسىمشارت جاسالعان. ىستانبۇل جانە بىشكەك قالالارىندا قازۇۋ-دىڭ فيليالدارى جۇمىس ىستەيدى. الماتىدا ۋنيۆەرسيتەت بازاسىندا ميفي (ماسكەۋ) فيليالى اشىلدى.

قاسىم-جومارت توقايەۆقا بىلتىر وقىتۋشى-پروفەسسورلار قۇرامىنىڭ جالاقىسى كوتەرىلگەنى تۋرالى باياندالدى. سونىمەن قاتار وقۋ عيماراتتارىنا، زەرتحانالارعا، جاتاقحانالارعا جوندەۋ جۇمىستارى جۇرگىزىلگەن. سوت شەشىمى بويىنشا قازۇۋ مەنشىگىنە ەكى جەر ۋچاسكەسى قايتارىلدى.

پرەزيدەنت ۋنيۆەرسيتەتتى ودان ءارى دامىتۋدىڭ ماڭىزدىلىعىن اتاپ ءوتتى جانە جوعارى وقۋ ورنىنىڭ حالىقارالىق مارتەبەسىن نىعايتىپ، عىلىمي-زەرتتەۋ جۇمىستارىن كۇشەيتۋ قاجەت ەكەنىنە نازار اۋداردى.