مەملەكەت باسشىسى قاسىم-جومارت توقايەۆ قازاقستان حالقىن وتباسى كۇنىمەن قۇتتىقتادى، دەپ حابارلايدى Almaty-akshamy.kz.
«قۇرمەتتى وتانداستار!
بارشاڭىزدى وتباسى كۇنىمەن شىن جۇرەكتەن قۇتتىقتايمىن!
ءاربىر ادام ءۇشىن ۇشقان ۇياسىنىڭ ورنى بولەك. وسكەلەڭ ۇرپاقتىڭ وتباسىندا تالىم-تاربيە الىپ، ۇلتتىق قۇندىلىقتاردى بويىنا ءسىڭىرۋى وتە ماڭىزدى.
«وتان وتباسىنان باستالادى» دەپ بەكەر ايتىلماعان. سالت-داستۇرگە قۇرمەت تە، تۋعان ەلگە سۇيىسپەنشىلىك تە قاسيەتتى قارا شاڭىراقتان باستاۋ الادى. وتباسى ينستيتۋتى ەڭبەكقورلىق، ءبىلىمپازدىق، تىلەكتەستىك سىندى «ادال ازاماتقا» ءتان قاسيەتتەردى قوعامدا جان-جاقتى دارىپتەۋ ارقىلى ۇلتتىڭ جاڭا ساپاسىن قالىپتاستىرۋعا ولشەۋسىز ۇلەس قوسادى.
بەرەكەلى شاڭىراق – ەلىمىزدى ۇيلەسىمدى ءارى ورنىقتى دامىتۋدىڭ مىزعىماس كەپىلى. سوندىقتان مەملەكەت انا مەن بالانى قورعاۋ جۇيەسىن جەتىلدىرۋگە، وتباسى قۇندىلىقتارىن ۇلىقتاۋعا باسا ءمان بەرەدى.
ءار وتباسىنىڭ ءال-اۋقاتىن جاقسارتۋ – ادىلەتتى قازاقستاندى قۇرۋ جولىنداعى نەگىزگى مىندەتتىڭ ءبىرى. قازاقستانداعى ءاربىر شاڭىراقتىڭ كەرەگەسى كەڭ، بوساعاسى بەرىك بولسىن!
بارشاڭىزعا زور دەنساۋلىق، باق-بەرەكە جانە تولاعاي تابىس تىلەيمىن!» - دەلىنگەن مەملەكەت باسشىسىنىڭ اقوردا جاريالاعان قۇتتىقتاۋىندا.