مەملەكەت باسشىسى كاتار ءامىرى شەيح ءتاميم بەن حاماد ءال تانيمەن تەلەفون ارقىلى سويلەستى، دەپ حابارلايدى Almaty-akshamy.kz Inform.kz-كە سىلتەمە جاساپ.
پرەزيدەنت قاسىم-جومارت توقايەۆ كاتار ءامىرى شەيح ءتاميم بەن حاماد ءال ءتانيدى فۋتبولدان الەم چەمپيوناتىن جوعارى دەڭگەيدە ۇيىمداستىرۋىمەن قۇتتىقتادى. بۇل جاھاندىق سپورتتىق شارا كاتاردىڭ دامىعان ءارى بەيبىتسۇيگىش ەل رەتىندە الەۋەتى مول ەكەنىن پاش ەتتى.
تاراپتار، ەڭ الدىمەن، ساۋدا-ەكونوميكالىق جانە ينۆەستيسيالىق سالالارداعى ەكىجاقتى ىنتىماقتاستىقتى نىعايتۋ پەرسپەكتيۆالارىن جوعارى باعالادى. وسى رەتتە كاتار ءامىرىنىڭ جۋىردا استاناعا جاساعان مەملەكەتتىك ساپارى بارىسىندا قول جەتكىزىلگەن ۋاعدالاستىقتاردى ءتيىمدى جۇزەگە اسىرۋدىڭ ماڭىزدى ەكەنى اتالىپ ءوتتى.
اڭگىمەلەسۋ بارىسىندا ەكىجاقتى ساۋدانى جانداندىرۋ جانە ەكونوميكانىڭ ءتۇرلى سالالارىندا بىرلەسكەن ينۆەستيسيالىق جوبالاردى جۇزەگە اسىرۋ قاجەتتىگى جونىندە ايتىلدى.
سونىمەن قاتار مەملەكەت باسشىسى بىرلەسكەن كۇش-جىگەردىڭ ناتيجەسىندە قاتار قازاقستانداعى ەڭ ءىرى ون ينۆەستوردىڭ قاتارىنا كىرەتىنىنە سەنىم ءبىلدىردى.