ۇيىم قىزمەتىنىڭ نەگىزگى اسپەكتىلەرى قاراستىرىلدى.
مەملەكەت باسشىسى قازاقستانعا العاش رەت رەسمي ساپارمەن كەلگەن شانحاي ىنتىماقتاستىق ۇيىمىنىڭ باس حاتشىسى چجان ءميندى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
كەزدەسۋدە ايماقتىق قاۋىپسىزدىكتى قامتاماسىز ەتۋ، ساۋدا-ەكونوميكالىق جانە مادەني-گۋمانيتارلىق بايلانىستاردى نىعايتۋ سياقتى باسىم باعىتتار بويىنشا قازاقستاننىڭ شانحاي ىنتىماقتاستىق ۇيىمىمەن اراداعى ىقپالداستىعىنا قاتىستى ماسەلەلەر تالقىلاندى. سونداي-اق قازىرگى گەوساياسي جاعدايداعى ۇيىم قىزمەتىنىڭ نەگىزگى اسپەكتىلەرى قاراستىرىلدى.
قاسىم-جومارت توقايەۆ چجان مينگە ءىلتيپات بىلدىرە وتىرىپ، ونىڭ شىۇ-نىڭ باس حاتشىسى قىزمەتىنە گەوساياسي احۋالدىڭ كۇردەلى جاعدايىندا، ياعني ۇيىمنىڭ ەرەكشە ءرول اتقاراتىن كەزىندە كىرىسكەنىن اتاپ ءوتتى.
«قازاقستان – شانحاي ىنتىماقتاستىق ۇيىمىنىڭ بەلسەندى مۇشەسى. شىۇ-نىڭ بىشكەكتە وتكەن سامميتىندە سويلەگەن سوزىمدە ونىڭ حالىقارالىق ارەناداعى ۇيىمداردىڭ ىشىندەگى ەڭ تابىستىسى ەكەنىن اتاپ ءوتتىم»، – دەدى قازاقستان پرەزيدەنتى.
سونىمەن قاتار مەملەكەت باسشىسى شىۇ-نىڭ كەڭ اۋقىمدى پروبلەمالاردى قامتيتىن كۇن ءتارتىبىنىڭ بىرەگەيلىگىنە باسا ءمان بەردى.
«شىۇ، شىن مانىندە، قايشىلىق تۋعىزاتىن ۇيىم ەمەس. ونىڭ قىزمەتى كونسترۋكتيۆتىلىككە، مۇشە مەملەكەتتەر اراسىنداعى ىنتىماقتاستىقتى دامىتۋعا باعىتتالعان. سونىمەن قاتار بۇل ۇيىم حالىقارالىق جاعدايدى جاقسارتۋعا زور ۇلەس قوسۋدى كوزدەيدى. سوندىقتان قازاقستان شىۇ-نىڭ جۇمىسىنا بەلسەندى قاتىسا بەرەدى جانە ونىڭ الەۋەتىن نىعايتۋعا ءوزىنىڭ ەلەۋلى ۇلەسىن قوسادى»، – دەدى قازاقستان كوشباسشىسى.
مەملەكەت باسشىسى ەلىمىزدەگى الداعى جالپىۇلتتىق رەفەرەندۋمعا بايقاۋشىلار ميسسياسىن ۇيىمداستىرعانى ءۇشىن شىۇ-نىڭ باس حاتشىسىنا ريزاشىلىعىن ءبىلدىردى.
ءوز كەزەگىندە چجان مين شىۇ-عا مۇشە باسقا دا مەملەكەتتەردىڭ كوشباسشىلارىمەن بىرگە ءوزىن ۇيىمنىڭ باس حاتشىسى لاۋازىمىنا تاعايىنداۋ تۋرالى شەشىم قابىلداۋ كەزىندە سەنىم ءبىلدىرىپ، قولداۋ كورسەتكەنى ءۇشىن قاسىم-جومارت توقايەۆقا العىس ايتتى. ول پرەزيدەنتكە ۇيىمنىڭ الەۋەتىن جانە مۇشە مەملەكەتتەرمەن اراداعى ىنتىماقتاستىقتى ودان ءارى نىعايتۋ ءۇشىن بار كۇشىن سالاتىنىن جەتكىزدى.
ديپلومات قازاقستاننىڭ الەۋمەتتىك-ەكونوميكالىق دامۋ جولىنداعى جەتىستىكتەرىن، پرەزيدەنتتىڭ باسشىلىعىمەن ىسكە اسىرىلىپ جاتقان اۋقىمدى رەفورمالاردى جوعارى باعالادى. چجان مين ۇيىمنىڭ الەۋەتىن ارتتىرۋعا ەلىمىزدىڭ قوسقان ەلەۋلى ۇلەسىن جانە ونى دامىتۋعا بەلسەندى اتسالىساتىنىن ايتتى.
اڭگىمەلەسۋ بارىسىندا ۇيىمنىڭ باس حاتشىسى پرەزيدەنتكە قىركۇيەك ايىندا سامارقاندتا وتەتىن شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ كەزەكتى وتىرىسىنا دايىندىق بارىسى تۋرالى مالىمەت بەردى.
سونىمەن قاتار قاسىم-جومارت توقايەۆ پەن چجان مين حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.