پرەزيدەنت قاسىم-جومارت توقايەۆ قازاقستاندىقتاردى جەڭىس كۇنى مەرەكەسىمەن قۇتتىقتادى

وتكەن بوزداقتارىمىزدى ماڭگى ەستە ساقتاۋ – قاسيەتتى بورىشىمىز – توقايەۆ

بۇل تۋرالى Almaty-akshamy.kz حابارلايدى Akorda.kz-كە سىلتەمە جاساپ.

قىمباتتى وتانداستار!

سىزدەردى جەڭىس كۇنىمەن شىن جۇرەكتەن قۇتتىقتايمىن!

9 مامىردىڭ ءتول تاريحىمىزداعى ورنى ەرەكشە. بۇل – جانقيارلىقپەن ەل قورعاعان اتالارىمىز بەن اكەلەرىمىزدىڭ، اجەلەرىمىز بەن انالارىمىزدىڭ رۋحىنا تاعزىم ەتەتىن كۇن. بۇل – ءفاشيزمدى جەڭگەن ەرلەردىڭ ەرەن ەرلىگىن جادىمىزدا جاڭعىرتاتىن كۇن.

سۇراپىل سوعىستا حالقىمىز كۇش-جىگەرىن سارپ ەتىپ، وراسان زور شىعىنعا ۇشىرادى. مايدانگەرلەردىڭ قاھارماندىعى مەن قايسارلىعىنىڭ، تىل ەڭبەككەرلەرىنىڭ جانكەشتىلىگىنىڭ ارقاسىندا جەڭىسكە جەتتىك. ەلدىڭ ازاتتىعى مەن ۇرپاقتىڭ جارقىن بولاشاعى ءۇشىن جانىن پيدا ەتكەن بوزداقتارىمىزدى ماڭگى ەستە ساقتاۋ – قاسيەتتى بورىشىمىز.

وكىنىشكە قاراي، قان مايداننىڭ قيامەتىن باسىنان وتكەرگەن ارداقتى اعا بۋىننىڭ قاتارى جىل وتكەن سايىن سيرەي تۇسۋدە. قازاقستاندا جەڭىستىڭ 77 جىلدىعىن نەبارى 376 ارداگەر، 68 347 تىل ەڭبەككەرى عانا قارسى الىپ وتىر. ەلىمىزدىڭ بارشا ازاماتتارى وزدەرىڭىزگە باس يەدى.

مەملەكەت سوعىس ارداگەرلەرىنە جان-جاقتى قولداۋ كورسەتىپ كەلەدى. ولار قوعامىمىزدىڭ دا قۇرمەتىن كورىپ، قامقورلىعىنا بولەنۋگە ءتيىس.

بارشاڭىزعا زور دەنساۋلىق، باق-بەرەكە تىلەيمىن! جەڭىس كۇنى قۇتتى بولسىن!