پرەزيدەنت قاسىم-جومارت توقايەۆ قانداي باسىلىمداردى وقيدى؟

اقوردانىڭ Telegram-كانالىندا پرەزيدەنت قاسىم-جومارت توقايەۆ تۇراقتى تۇردە وقيتىن باسىلىمدارعا ۆيدەوشولۋ ۇسىنىلدى، دەپ حابارلايدى Almaty-akshamy.kz 

مەملەكەت باسشىسى تۇراقتى وقيتىن وتاندىق جانە شەتەلدىك باسىلىمدار اراسىندا «ەگەمەن قازاقستان»، «ايقىن»، «استانا اقشامى»، «انا ءتىلى»، «قازاق ادەبيەتى»، «جاس قازاق»، «تۇركىستان»، «جاس الاش»، «قالا مەن دالا»، «دەلوۆايا نەدەليا»، «ۆرەميا»، «كازاحستانسكايا پراۆدا»، «ليتەر»، «ارگۋمەنتى ي فاكتى»، «كومسومولسكايا پراۆدا» گازەتتەرى، «The Economist» جۋرنالى بار.

«مەملەكەت باسشىسى ب ا ق كوتەرگەن وزەكتى ماسەلەلەر بويىنشا ۇنەمى تاپسىرمالار بەرىپ وتىرادى»، - دەلىنگەن اقوردانىڭ باسپا ءسوز قىزمەتىنىڭ مالىمەتىندە.

ەسكە سالايىق، ق.توقايەۆ مەرزىمدى ءباسپاسوزدى ۇزبەي قارايتىنىن «QAZAQSTAN» ۇلتتىق تەلەارناسىنا بەرگەن سۇحباتىندا ايتقان بولاتىن.

«بۇل – مەنىڭ بۇرىننان قالىپتاسقان داعدىم. «ەگەمەن قازاقستان»، «ايقىن»، «استانا اقشامى» گازەتتەرىن وقيمىن. «انا ءتىلى»، «قازاق ادەبيەتى»، «جاس قازاق»، «تۇركىستان» گازەتتەرىن دە مىندەتتى تۇردە وقىپ تۇرامىن. جالپى، مەن كوپ وقيتىن اداممىن. جاقسى ماقالا نەمەسە سۇحبات كورسەم، استىن سىزىپ وقۋعا تىرىسامىن. وزەكتى ماسەلە بايقاسام، وعان قاتىستى ناقتى تاپسىرما بەرەمىن. الەۋمەتتىك جەلىدەگى وتكىر جازبالاردى دا ۇنەمى شولىپ وتىرامىن. ال، تەلەديداردان جاڭالىقتار مەن ساراپتامالىق باعدارلامالاردى كورەمىن»، - دەگەن ەدى قازاقستان پرەزيدەنتى.