ەلىمىزدە «جۇرەك جىلۋى» قايىرىمدىلىق اكسياسى ءوتىپ جاتىر.
ونىڭ اياسىندا ەرىكتىلەر مەن بەلسەندى ازاماتتار حالىقتىڭ الەۋمەتتىك از قامتىلعان توپتارىنا: كوپبالالى وتباسىلاردىڭ، ەرەكشە قاجەتتىلىكتەرى بار جانداردىڭ، زەينەتكەرلەردىڭ جانە وزگە دە تۇرعىنداردىڭ ءوتىنىشى مەن تىلەگىن ورىنداۋعا كومەكتەسەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
استانا اكىمى جەڭىس قاسىمبەك «جۇرەك جىلۋى» قايىرىمدىلىق اكسياسى اياسىندا مەملەكەت باسشىسىنىڭ اتىنان قالا تۇرعىنىنا سىيلىق تابىستادى.
21 ناۋرىز كۇنى پرەزيدەنت قاسىم-جومارت توقايەۆ «جۇرەك جىلۋى» اكسياسىنا باستاۋ بەرىپ، ادامداردىڭ تىلەك-ارمانى جازىلعان حاتتارى بار ساندىقشادان ولاردىڭ ءبىرىن الىپ شىقتى. مەملەكەت باسشىسى حاتتى وقىپ، ونىڭ يەسىنىڭ تىلەگى ورىندالاتىنىن ايتتى.
وتىنىشتە استانا تۇرعىنى تونومەتر سۇراعان بولاتىن. بۇگىن ەلوردا اكىمى جەڭىس قاسىمبەك گۇلجاحان سىدىقوۆامەن كەزدەسىپ، مەملەكەت باسشىسىنىڭ اتىنان تونومەتردى تابىستادى. سونداي-اق وعان ماتەريالدىق كومەك كورسەتىلىپ، ساناتورييگە جولداما بەرىلەدى. گۇلجاحان سىدىقوۆا پرەزيدەنت پەن «جۇرەك جىلۋى» قايىرىمدىلىق اكسياسىنا قاتىسۋشىلارعا العىس ءبىلدىردى.