تۇرعىن ءۇي الاپتارى بوي كوتەرگەن كەزدە ونىمەن بىرگە مىندەتتى تۇردە مەكتەپ پەن بالاباقشا سالىنۋى كەرەك. بۇل تۋرالى ۇلتتىق قوعامدىق سەنىم كەڭەسىنىڭ 6-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«مەكتەپتەگى ورىن تاپشىلىعى وتە وزەكتى ماسەلە. مەن بيىلعى جولداۋىمدا 2025 جىلدىڭ سوڭىنا دەيىن 1 مىڭ مەكتەپ سالۋ تۋرالى تاپسىرما بەردىم. بۇل - ماڭىزدى مىندەتتىڭ ءبىرى. جاۋاپتى مەملەكەتتىك ورگانداردىڭ جۇمىسى وسى تاپسىرمانى ساپالى ءارى ءتيىمدى ورىنداۋىنا قاراي باعالانادى. ءقازىر مەكتەپ سالۋ ءۇشىن جەر تەلىمىن الۋ ايتارلىقتاي قيىندىق تۋعىزاتىن بولدى. ءوڭىر اكىمدەرىنە بارلىق مەكتەپكە جەر تەلىمىن الدىن الا ءبولۋدى تاپسىرامىن»، - دەدى مەملەكەت باسشىسى.
ق ر پرەزيدەنتى ەلدى مەكەننىڭ جوسپارىن جاساپ، تۇرعىن ءۇي سالعان كەزدە الەۋمەتتىك نىسان سالۋ قاجەتتىگى ەسكەرىلۋى تيىستىگىن باسا ايتتى.
«بۇل زاڭنامادا كورسەتىلگەن تالاپ. ءبىراق، جەرگىلىكتى اتقارۋشى ورگاندار بەلگىلەنگەن تالاپتى ورىنداي بەرمەيدى. تاعى دا قايتالاپ ايتامىن، تۇرعىن ءۇي الاپتارى بوي كوتەرگەن كەزدە ونىمەن بىرگە مىندەتتى تۇردە مەكتەپ پەن بالاباقشا سالىنۋى كەرەك. ۇكىمەتكە زاڭنىڭ ساقتالۋىن قاتاڭ باقىلاۋدى تاپسىرامىن»، - دەدى قاسىم-جومارت توقايەۆ.