پرەزيدەنت قاسىم-جومارت توقايەۆ ماڭعىستاۋ وبلىسى مۇنايلى اۋدانى تۇرعىنىنىڭ تۇششى سۋ تاپشىلىعىنا قاتىستى ارىز-شاعىمىنا نازار اۋداردى
مەملەكەت باسشىسى ۇكىمەت پەن وبلىس اكىمدىگىنە اتالعان ماسەلەنى مۇمكىندىگىنشە قىسقا مەرزىمدە شەشۋدى تاپسىردى، دەپ حابارلايدى Almaty-akshamy.kz.
ۇكىمەتتىڭ مالىمەتى بويىنشا بۇگىندە وڭىردەگى سۋ تاپشىلىعى – ەڭ وزەكتى ماسەلەلەردىڭ ءبىرى. سۋدىڭ جەتىسپەۋشىلىگى تاۋلىگىنە 77 200 تەكشە مەتردى قۇرايدى. اۋىزسۋدىڭ تاپشىلىعى، اسىرەسە، جاز مەزگىلىندە قاتتى سەزىلەدى. مۇنايلى اۋدانىندا كۇردەلى جاعداي قالىپتاسىپ وتىر. قازىرگى ۋاقىتتا «كاسپيي» سۋ تۇشىتۋ زاۋىتىنداعى ىستەن شىققان سورعى قوندىرعىسىنىڭ جوندەلىپ جاتقانىنا بايلانىستى اۋدانداعى سۋ بەرۋ مولشەرى تاۋلىگىنە 13 مىڭ تەكشە مەتردەن 10 مىڭ تەكشە مەترگە دەيىن ازايعان.
ماسەلەنى كەزەڭ-كەزەڭىمەن شەشۋ ءۇشىن وڭىردە سۋ تۇشىتۋ زاۋىتتارى مەن قوندىرعىلاردىڭ قۇرىلىسى جۇرگىزىلۋدە. حالىق سانىنىڭ جىل سايىن وسۋىنە بايلانىستى «كاسپيي» سۋ تۇشىتۋ زاۋىتىنىڭ قۋاتىن تاۋلىگىنە 20 مىڭ تەكشە مەترگە ارتتىرۋ قاجەت. بۇل اۋىزسۋ بەرۋ مولشەرىن تاۋلىگىنە 40 مىڭ تەكشە مەترگە دەيىن جەتكىزۋگە مۇمكىندىك بەرەدى. وسى ماقساتتا ۇكىمەت رەزەرۆىنەن 5،6 ميلليارد تەڭگە ءبولۋ جونىندە شەشىم قابىلداندى. مۇنايلى اۋدانىن سۋمەن «ماڭعىستاۋ جىلۋ» مكك قامتاماسىز ەتەدى. اۋىزسۋ تاپشىلىعىنا بايلانىستى «ماڭعىستاۋ جىلۋ» مكك حالىققا سۋدى قۇبىر ارقىلى كەستە بويىنشا جەتكىزەدى. سونىمەن قاتار سۋدى اۋدان تۇرعىندارىنىڭ سۇرانىسى بويىنشا سۋ تاسيتىن كولىكپەن اكەلەدى.