پرەزيدەنت "ماعجان" پەساسىنان ءۇزىندى تاماشالاپ، تەاتردى ارالادى
مەملەكەت باسشىسى پەتروپاۆلداعى ءسابيت مۇقانوۆ اتىنداعى قازاق سازدى-دراما تەاترىندا زيالى قاۋىم وكىلدەرىمەن كەزدەستى، دەپ حابارلايدى Almaty-akshamy.kz.
پرەزيدەنت سولتۇستىك قازاقستان وبلىسىنىڭ ورتالىعىندا جاڭادان بوي كوتەرگەن قازاق سازدى-دراما تەاترىنىڭ عيماراتىن ارالاپ كوردى، دەپ حابارلايدى اقوردا.
وسى شىعارماشىلىق ۇجىمدا كوپ جىلدان بەرى ەڭبەك ەتىپ كەلە جاتقان تەاتر ديرەكتورى ءبىرجان جالعاسبايەۆ ونەر ورداسىنىڭ ۇجىمى بەرتىنگە دەيىن "ەنەرگەتيكتەر سارايىن" پانالاعانىن، وسى جىلدار ىشىندە ءتۇرلى جانردا قويىلىمدار ساحنالاپ، حالىقارالىق، رەسپۋبليكالىق بايقاۋلاردا جۇلدە العانىن جەتكىزدى. ونىڭ ايتۋىنشا، جاڭا عيماراتقا كوشكەن ۇجىم رەپەرتۋارىن جاڭارتۋعا، شەتەلدىك جانە وتاندىق ونەر ۇجىمدارىمەن شىعارماشىلىق بايلانىس ورناتۋعا مۇمكىندىك الدى.
پرەزيدەنت "ماعجان" پەساسىنان ءۇزىندى تاماشالاپ، تەاتردى ارالادى. سودان كەيىن قىزىلجار ولكەسىنىڭ زيالى قاۋىم وكىلدەرىمەن جانە قوعام بەلسەندىلەرىمەن اڭگىمەلەستى.
"بىرلىگىمىز – ءارالۋاندىقتا. بۇل – ءبىزدىڭ ەڭ باستى ۇرانىمىز ءارى ۇستانىمىمىز. قازاق بولسىن، باسقا ۇلت بولسىن – ءبارىمىز ءبىر حالىقپىز. سوندىقتان ءبارىمىز حالقىمىزدىڭ، ەلىمىزدىڭ وركەندەۋىنە قىزمەت ەتۋىمىز كەرەك. بارشاڭىزعا باق-بەرەكە تىلەيمىن. ءبىز ءاردايىم بىرگە بولامىز. العا قادام باسۋ ءۇشىن اۋىزبىرشىلىگىمىزدى، دوستىعىمىز بەن تۇراقتىلىعىمىزدى كوزدىڭ قاراشىعىنداي ساقتاۋىمىز كەرەك. ارينە، ەلىمىزدە الەۋمەتتىك-ەكونوميكالىق جانە قوعامدىق سيپاتتاعى ماسەلەلەر بار. پروبلەماسىز ەل بولمايدى. ءتىپتى، ەڭ دامىعان، باقۋاتتى ەلدەردە دە پروبلەما بار. ەگەر ەلدە ءتارتىپ بولسا، زاڭ قاتاڭ ساقتالسا، كوزدەگەن ناتيجەگە قول جەتكىزەمىز"، – دەدى مەملەكەت باسشىسى.
پرەزيدەنت قوعام بەلسەندىلەرىمەن ەلدىڭ دامۋى جانە وسكەلەڭ ۇرپاق تاربيەسى جونىندە پىكىر الماستى. سونىمەن قاتار مەملەكەت باسشىسى قازاق ادەبيەتىنىڭ جارقىن وكىلى، اقىن ماعجان جۇمابايەۆتىڭ 130 جىلدىعىن جوعارى دەڭگەيدە اتاپ ءوتۋ قاجەت ەكەنىن ايتتى.