پرەزيدەنت كەڭەسشىسى مالىك وتاربايەۆ الماتىدا ءدىن وكىلدەرىمەن كەزدەستى

بۇل كەزدەسۋ مالىك وتاربايەۆتىڭ مەگاپوليسكە ساپارى اياسىندا، مەملەكەت باسشىسى IV ۇلتتىق قۇرىلتاي وتىرىسىندا بەرگەن تاپسىرمالاردى ورىنداۋ ماقساتىندا ءوتتى، دەپ حابارلايدى aqshamnews.kz

جيىن بارىسىندا الماتى قالاسىنىڭ باس يمامى تولەبي وسپان جانە باسقا دا قاتىسۋشىلار ءدىني مەكەمەلەردىڭ اتقارىپ جاتقان جۇمىسى، كادر دايارلاۋ ەرەكشەلىكتەرى، مەشىتتەردىڭ ماتەريالدىق-تەحنيكالىق بازاسى مەن تەولوگيالىق وقۋ ورىندارىنىڭ قىزمەتى تۋرالى ايتتى.

سونداي-اق، باس يمام يسلام ءدىنىنىڭ ماڭىزدى شارتتارىنىڭ ءبىرى – قاجىلىققا دايىندىق بارىسى، ونىڭ ۇيىمداستىرۋشىلىق جانە قارجىلىق قىرلارى، الماتى قالاسىنان قاجىلار توبىن قۇرۋ ماسەلەلەرى جونىندە مالىمەت بەردى.

قاتىسۋشىلار مەملەكەت باسشىسى ۇلتتىق قۇرىلتايدا ايتقان باستامالاردى قولدايتىندارىن ءبىلدىرىپ، وتباسى ينستيتۋتىنىڭ ماڭىزىن ارتتىرۋ، ەسىرتكىگە، قۇمار ويىندارعا تاۋەلدىلىكتىڭ الدىن الۋ جانە ءدىندار ازاماتتاردىڭ راديكالدى-ەكسترەميستىك كوزقاراستارعا بوي الدىرۋىنا جول بەرمەۋ باعىتىندا رۋحاني-ادامگەرشىلىك ىقپال ەتۋگە كۇش سالىپ جاتقانىن جەتكىزدى.

ءوز سوزىندە مالىك وتاربايەۆ مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدا قويعان ءبىرقاتار ماڭىزدى مىندەتتەرىنە توقتالدى. ولاردىڭ قاتارىندا – ازاماتتاردىڭ بويىندا وتانسۇيگىشتىك، زاڭعا قۇرمەتپەن قاراۋ، ءوز مىندەتتەرىن دۇرىس ءتۇسىنۋ مەن ورىنداۋ جانە مەملەكەتتىلىكتى ساقتاۋ ماڭىزدى ەكەنىن اتاپ ءوتتى.

ادىلەتتى قازاقستاندى قۇرۋ ىسىندە تەك مەملەكەتتىك ورگاندار مەن مادەنيەت، ءبىلىم بەرۋ سالاسى عانا ەمەس، ءدىني قاۋىمداستىقتاردىڭ دا ءرولى زور. ازاماتتاردىڭ بوگدە يدەولوگيا مەن جاعىمسىز مىنەز-قۇلىققا بوي الدىرۋىنا جول بەرمەۋ اسا ماڭىزدى.

حالىقارالىق ساياسي جانە ەكونوميكالىق جاعدايدىڭ كۇردەلىلىگىن ەسكەرە وتىرىپ، قازاقستان كەز كەلگەن كۇردەلى ۇردىستەرگە دايىن بولۋى قاجەت.

ءدىني مەكەمەلەر مەن ءدىن قىزمەتكەرلەرى ءۇشىن ساپالى ءدىني ادەبيەتتى پايدالانۋ، مەشىتتەردەگى كىتاپحانالىق قوردى تولىقتىرۋ ماڭىزدى. مەملەكەت باسشىسى ايقىنداعان باسىمدىقتاردىڭ ىشىندە ەل بىرلىگى مەن ىنتىماعىنىڭ ماڭىزى ەرەكشە ەكەنىن مالىك وتاربايەۆ اتاپ ءوتتى.