زاڭ كاسىپتىك بىلىكتىلىكتى تانۋ تارتىبىنە بايلانىستى قوعامدىق قاتىناستاردى رەتتەۋگە باعىتتالعان.
بۇگىن مەملەكەت باسشىسى قاسىم-جومارت توقايەۆ "كاسىپتىك بىلىكتىلىك تۋرالى" زاڭعا قول قويدى، دەپ حابارلايدى Almaty-akshamy.kz اقورداعا سىلتەمە جاساپ.
سونداي-اق مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپتىك بىلىكتىلىك، مەملەكەتتىك ناگرادالار، الەۋمەتتىك قامسىزداندىرۋ جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى.
ق ر ەڭبەك جانە حالىقتى الەۋمەتتىك قورعاۋ مينيسترلىگى "كاسىپتىك بىلىكتىلىك تۋرالى" جانە "قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپتىك بىلىكتىلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭداردىڭ جوباسىن ازىرلەدى.
ۆەدومستۆو وكىلدەرىنىڭ مالىمدەۋىنشە، زاڭ جوبالارى ۇلتتىق بىلىكتىلىك جۇيەسىندە بەلگىلى ءبىر كاسىپ ءتۇرىن نەمەسە ەڭبەك قىزمەتىنىڭ ءتۇرىن جۇزەگە اسىرۋعا ۇمىتكەر جەكە تۇلعانىڭ كاسىپتىك بىلىكتىلىگىن تانۋ تارتىبىنە بايلانىستى قوعامدىق قاتىناستاردى رەتتەۋگە باعىتتالعان.
سونداي-اق زاڭ جوباسىندا كانديداتتاردىڭ كاسىپتىك بىلىكتىلىكتەردى تانۋ راسىمىنەن ءوتۋ قۇقىقتارى، كاسىپتىك بىلىكتىلىكتەردى ەرىكتى نەگىزدە تانۋ شارتتارى مەن ءتارتىبى ايقىندالادى.