جۋىردا پرەزيدەنت قازاقستان حالقىنا جولداۋىن ارنادى. سوعان قاتىستى ءۇن قوسقانداردىڭ ءبىرىنىڭ پىكىرىن Almaty-akshamy.kz Assembly.kz-كە سىلتەمە جاساپ ۇسىنادى.
1 قىركۇيەك «ءبىلىم كۇنى» مەرەكەسىمەن قاتار ەلىمىزدىڭ تاريحىندا، جاڭا ءبىر ساياسي احۋال ورىن الىپ وتىرعانى بارشامىزعا ايان. ەلىمىز جىل سايىن ۇلكەن ۇمىتپەن كۇتەتىن ەل پرەزيدەنتىنىڭ جولداۋى 2020-2021 جاڭا وقۋ جىلىنىڭ باستالۋىمەن قاتار كەلۋى، ءاربىر ازاماتىنىڭ ەرەكشە نازارىن اۋداردى. ەل پرەزيدەنتى قاسىم-جومارت كەمەل ۇلى توقايەۆتىڭ قازاقستان حالقىنا جولداۋى بۇكىل الەمدى الاڭداتىپ وتىرعان پاندەميامەن كۇرەس جولدارىن، ونىڭ ەلىمىزگە الىپ كەلگەن زاردابى مەن وزگەرىستەرىن ايتا كەلىپ، ەلىمىزدىڭ الەۋمەتتىك دامۋىنا، ەل تۇرعىندارىنىڭ تابىسى مەن جۇمىس ورىندارىنىڭ ساقتالۋىن، حالقىمىزدىڭ دەنساۋلىعى مەن ءومىرىن ساقتاۋ جولىنداعى جۇمىستارعا باستى نازار اۋدارۋ كەرەكتىگىن قاداپ ايتتى. سونداي-اق الەم پاندەميانى تولىق جەڭۋى ءۇشىن كەم دەگەندە 2 جىل مەرزىم ۋاقىت كەرەك ەكەنىن، ال قازىرگى تاڭداعى پاندەميا الىپ كەلگەن ەكونوميكالىق-الەۋمەتتىك داعدارىستى قالىپقا تۇسىرۋگە 5 جىل ۋاقىت كەتەتىنى دە ايتىلدى. بۇگىنگى ەل پرەزيدەنتىنىڭ جولداۋى ەلىمىزدىڭ بولاشاق دامۋى مەن ەرتەڭگى كۇنگە بەتبۇرىسىن ايقىنداپ بەردى. بارلىق باعىتتاردىڭ دامۋى، ەل تاعدىرى ءۇشىن ماڭىزدى. قازاق حالقىنىڭ ءاربىر ازاماتىنىڭ كوكەيىندە جۇرگەن ماسەلەنى شەشۋ جولىنا ارنالعان جاڭا جولداۋ، ەل دامۋى مەن حالقىمىزدىڭ ومىرىندە ءبىرشاما جاڭاشىلدىقتىڭ بولاتىنىن كورسەتىپ بەرگەندەي.
ەل پرەزيدەنتى ءوز جولداۋىندا، قاراپايىم ەڭبەك ادامىنىڭ، زەينەتكەرلەردىڭ، مەملەكەتتىك قىزمەتكەرلەر مەن ءبىلىم-عىلىم سالاسىنداعى ەڭبەك ەتىپ جۇرگەن عالىمداردىڭ، قالا بەردى مەملەكەتتىك باسشىلىقتا وتىرعان دەپۋتاتتار مەن مينيسترلەردىڭ، قۇقىق قورعاۋ ورگاندارى مەن دەنساۋلىق ساقتاۋ سالاسى قىزمەتكەرلەرىنىڭ ءارقايسىنىڭ مىندەتىن، قىزمەتىندەگى وزگەرىستەر مەن جاڭالىقتاردى سانامالاپ ايتىپ ءوتتى. اسىرەسە سوڭعى ۋاقىت كولەمىندە دەنساۋلىق سالاسى قىزمەتكەرلەرىنىڭ ەڭبەگىنىڭ باعالانۋى كەرەكتىن، الەۋمەتتىك كومەكتىڭ تاعايىندالۋىن تاپسىردى. سەبەبى پاندەميا ۋاقىتىندا الدىڭعى شەپتە اۋىر دەرتپەن كۇرەسكەن اق حالاتتى ابزال جاندار ەكەنى بارشامىزعا بەلگىلى. قانداي زامان، قاي قوعام بولماسىن ءبىلىم الۋدى ەشقاشان شەتكە ىسىرىپ قويعان ەمەس. قازىرگى قوعام ءبىلىمدى جاستاردىڭ قوعامى. جاس بۋىنعا ءبىلىم بەرۋ جولىندا ەڭبەك ەتىپ جۇرگەندىكتەن ءبىلىم سالاسىندا بولىپ جاتقان بارلىق وزگەرىستەر مەن جاڭالىقتار مەنىڭ جانىما جاقىن. ەل دامۋىنداعى بارلىق ماڭىزدى دەگەن ماسەلەلەردى اتاپ ايتىپ، شەشۋ جولدارىن ۇسىنا كەلە، ەل پرەزيدەنتى ءوز جولداۋىنداعى بەسىنشى ماسەلە رەتىندە ءبىلىم بەرۋ سالاسىنا توقتالىپ ءوتتى. الەم ەلدەرىندەگى پاندەميالىق جاعدايلاردى ەسكەرە، ەلىمىزدەگى كارانتيندىك جاعدايدى قاتاڭ ساقتاي وتىرىپ، ءبىلىم بەرۋ سالاسىنىڭ قاشىقتىقتان ۇيىمداستىرىلىپ وتىرعانىن، سونداي-اق قاشىقتىقتان ءبىلىم بەرۋ جۇيەسىنىڭ ادەتتەگى ءداستۇرلى ساباققا جەتپەيتىنىنە توقتالدى. ءداستۇرلى جۇيە بويىنشا ءبىلىم الۋعا بارشا جاعداي جاساۋدى تاپسىرىپ وتىر. ءاربىر وقۋشى مەن ۇستازدىڭ دەنساۋلىعى مەن ءومىرىن ساقتاۋ جولىن ەسكەرە وتىرىپ، ءداستۇرلى جۇيەدە ءبىلىم بەرۋگە دايىندىق جۇمىستارىن جۇرگىزۋدى دە اتاپ ايتتى. قاشىقتىقتان ءبىلىم بەرۋ جۇيەسىندە دە بارىنشا دامىتىلعان ونلاين ءبىلىم بەرۋ پلاتفورمانىڭ دايىندالۋ كەرەك ەكەنىن تىلگە تيەك ەتتى. باستى نازاردى جاسوسپىرىمدەردىڭ سپورت پەن شىعارماشىلىق تۇرعىدا ءبىلىم الۋىنا جاعداي جاساۋعا جۇمساۋدى تاپسىردى. ءاربىر جاس بۇلدىرشىنگە مەكتەپكە دەيىنگى وقۋ-تاربيە بەرىلۋى كەرەكتىگىن، بالاباقشالار مەن مەكتەپكە دەيىنگى ءبىلىم بەرۋ ورىندارىن كوبەيتۋ ءۇشىن جۇمىس جاساۋدى، ءبىلىمدى ۇرپاقتىڭ ەل بولاشاعى ەكەنىن ەسكە سالدى.
سونىمەن قاتار پرەزيدەنتىمىز جىلداعى جولداۋىندا اتاپ ايتاتىن تاعى ءبىر ماسەلە ۇستازداردىڭ ەڭبەكاقىسى جايلى بولدى. الداعى قاڭتار ايىندا ەل ۇستازدارىنىڭ ەڭبەكاقىسىن 25 پايىزعا ءوسىرۋدى تاپسىردى. ءوزىم دە ۇستاز رەتىندە مەملەكەت تاراپىنان جاسالىپ وتىرعان ءاربىر كومەك ءبىزدى جىگەرلەندىرە تۇسەدى دەگىم كەلەدى. مەن ەلىمىزدىڭ دامۋى مەن جاڭارۋى جولىندا بار كۇش جىگەرىمىزدى سالا وتىرىپ، ەڭبەك ەتۋ ءبىزدىڭ باستى پارىزىمىز سانايمىن. ەل پرەزيدەنتى ءوز جولداۋىنىڭ ءتۇيىنى رەتىندە ۇلت ۇستازى احمەت بايتۇرسىن ۇلىنىڭ «ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك»، دەگەن دانالىق سوزىمەن بەكىتتى. قازىرگىدەي جاڭارعان جاڭا زاماندا ەلىمىزدىڭ ءاربىر ازاماتى جوعارى ءبىلىم مەن تاباندى ەڭبەكتىڭ ناتيجەسىندە عانا بيىك بەلەستەردەن كورىنەتىنى اشىق جەتكىزدى. ەل ازاماتتارىن، وتانىمىزدىڭ الدىندا ادال قىزمەت ەتۋگە، ابىرويلى ءىس جاساۋعا، تەرەڭ ءبىلىم الىپ، ەرىنبەي ەڭبەك ەتۋگە شاقىردى.