پرەزيدەنتتىڭ قاتىسۋىمەن اۋىل شارۋاشىلىعى ەڭبەككەرلەرىنىڭ ەكىنشى فورۋمى ءوتتى.
جيىندا مەملەكەت باسشىسى جايىلىمدىق جەرلەر اۋىل تۇرعىندارىنا جانە ناقتى جوسپارى بار ينۆەستورلارعا بەرىلۋگە ءتيىس ەكەندىگىن ايتتى، - دەپ حابارلايدى Aqshamnews.kz.
"ەكىنشى. بۇل – جەر ماسەلەسى. حالىق جەردىڭ يگىلىگىن كورۋى كەرەك. مەن بىرنەشە جىل بۇرىن زاڭسىز الىنعان جانە يگەرىلمەي بوس جاتقان جەرلەردى قايتارىپ الۋ تۋرالى ناقتى تاپسىرما بەردىم. بۇگىن وسى ماسەلە بويىنشا مينيستر باياندادى. 2022 جىلدان بەرى 14 ميلليون گەكتاردان استام اۋىل شارۋاشىلىعى جەرى مەملەكەتكە قايتارىلدى. جەردى قولىنان ءىس كەلەتىن، جۇمىس ىستەۋگە نيەتتى ازاماتتارعا بەرۋ كەرەك دەگەن تاپسىرما بىرنەشە رەت ايتىلدى. الايدا، بۇل ماڭىزدى جۇمىس باياۋ جۇرگىزىلىپ جاتىر. سوندىقتان جولداۋدا مەملەكەتكە قايتارىلعان جەردى كەلەسى جىلدىڭ ورتاسىنا دەيىن تۇگەلدەي تۇراقتى اينالىمعا ەنگىزۋ تۋرالى تاپسىرما بەرىلدى. اكىمدىكتەردىڭ وسى ماسەلەگە قاتىستى جوسپارلارى قاعاز جۇزىندە قالىپ قويماۋى كەرەك. ەڭ باستىسى، جەر تاعى دا يگەرىلمەي، بوس قالماۋى قاجەت" - دەپ تاپسىردى پرەزيدەنت.
ۇكىمەت ءقازىر مال شارۋاشىلىعى سالاسىنداعى بيزنەستى قولداۋ جوسپارىن ازىرلەپ جاتىر.
"جايىلىمدىق جەرلەر اۋىل تۇرعىندارىنا جانە ناقتى جوسپارى بار ينۆەستورلارعا بەرىلۋگە ءتيىس. كەلەسى جىلدىڭ ورتاسىندا قابىلداناتىن بۇل قۇجاتتا وسى ماسەلەنىڭ شەشىمدەرى ايقىن كورسەتىلۋى كەرەك. تاعى ءبىر تۇيتكىل – جەرگە بەرىلەتىن كەپىلدىك قۇننىڭ تومەن بولۋى. كاداسترلىق باعالاۋ جۇيەسى قازىرگى نارىقتاعى شىنايى احۋالعا مۇلدەم سايكەس كەلمەيدى. ۇكىمەت بۇل ماسەلەگە نازار اۋدارۋى كەرەك، كاداسترلىق قۇندى ايقىنداۋ ءتاسىلىن قايتا قاراۋعا ءتيىس. جەر قاتىناستارى سالاسىنداعى كەدەرگىلەر قازىرگى زامانعا ساي شارۋاشىلىقتار قۇرۋعا بوگەت بولىپ وتىر. مەن جولداۋىمدا ۇكىمەتكە كەلەسى جىلدىڭ سوڭىنا دەيىن جەر رەسۋرستارىنىڭ ءبىرىڭعاي سيفرلىق كارتاسىن ازىرلەۋدى تاپسىردىم. قۇزىرلى مينيسترلىكتەر وسى ماڭىزدى جۇمىس بويىنشا نە ىستەلىپ جاتقانىن 7 كۇننىڭ ىشىندە بايانداۋى كەرەك"، - دەپ ناقتىلادى مەملەكەت باسشىسى.
كەلەسى ماسەلە رەتىندە پرەزيدەنت جەر تەلىمدەرىنىڭ ەلەكتروندى كونكۋرس ارقىلى بەرىلۋى كەرەكتىگىنە توقتالدى.
"جەر العان ازاماتتاردىڭ ەڭ باستى مىندەتى – جەردى ءتيىمدى يگەرۋ، ياعني، بەرىلگەن جەردى كادەگە جاراتۋ. بۇعان قوسا، جەر رەسۋرستارىنا مونيتورينگ جۇرگىزۋ تاسىلدەرىن قايتا قاراۋ قاجەت. ءقازىر اۋىل شارۋاشىلىعى جەرلەرىنە قاتىستى دەرەكتەر تولىق ەمەس. مۇنداي احۋال جەرگە باقىلاۋ جاساۋعا جانە يگەرىلمەي بوس جاتقان جەرلەردى قايتارىپ الۋعا كەدەرگى كەلتىرەدى. جەردى ءبولىپ-تاراتۋ ۇدەرىسى بويىنشا اقپارات اشىق ءارى قولجەتىمدى بولۋى قاجەت"، - دەدى پرەزيدەنت قاسىم-جومارت توقايەۆ.