مەملەكەت باسشىسىنا قازاقستانداعى كريمينوگەندىك جاعداي تۋرالى باياندالدى. ەرجان سادەنوۆتىڭ ايتۋىنشا، ەلىمىزدە جاسالاتىن قىلمىستار سانىنىڭ تومەندەۋ ديناميكاسى ساقتالىپ وتىر. كىسى ءولتىرۋ 20 پايىزعا، ۇرلىق 28 پايىزعا، قاراقشىلىق 32 پايىزعا ازايعان. توناۋ، بۇزاقىلىق، مال ۇرلىعى، دەنساۋلىققا اۋىر زيان كەلتىرۋ فاكتىلەرى، سونداي-اق باسقا دا قىلمىس تۇرلەرى تومەندەگەن.
قاسىم-جومارت توقايەۆقا قۇقىقبۇزۋشىلىققا مۇلدە توزبەۋشىلىك قاعيداتىن قالىپتاستىرۋ، زاڭعا قايشى ارەكەتتەر مەن قىلمىس جاساعانى ءۇشىن جازانىڭ بۇلتارتپاستىعىن ىسكە اسىرۋ، جول قاۋىپسىزدىگىن قامتاماسىز ەتۋ جۇمىستارى تۋرالى مالىمەت بەرىلدى.
بۇگىندە 8 ميلليون 500 مىڭ زاڭعا قايشى ارەكەت انىقتالعان. بۇل وتكەن جىلمەن سالىستىرعاندا 1 ميلليونعا كوپ. جاسالعان قۇقىقبۇزۋشىلىقتار ءۇشىن 90 ميلليارد تەڭگە كولەمىندە اكىمشىلىك ايىپپۇل سالىندى، 71 ميلليارد تەڭگە ءوندىرىپ الىندى.
سونىمەن قاتار پرەزيدەنتكە ىشكى ىستەر ورگاندارىنىڭ جۇمىسىن جەتىلدىرۋ، سونىڭ ىشىندە ءىىو قىزمەتكەرلەرىن اتتەستاسيادان وتكىزىپ، ۆەدومستۆونى لايىقسىز مامانداردان تازارتۋ شارالارى تۋرالى باياندالدى.
كەزدەسۋ سوڭىندا قاسىم-جومارت توقايەۆ «زاڭ جانە ءتارتىپ» قاعيداتىن قامتاماسىز ەتۋ جونىندە ءبىرقاتار ناقتى تاپسىرما بەردى.
مەملەكەت باسشىسى قوعامدا ادىلدىك پەن ءتارتىپ ورناتۋ ءۇشىن قۇقىق قورعاۋ ورگاندارىنىڭ قىزمەتكەرلەرىنە ۇلكەن جاۋاپكەرشىلىك جۇكتەلگەنىن ايتتى.