كەزدەسۋ بارىسىندا قازاقستان مەن ەۋروپا كەڭەسى اراسىنداعى ىنتىماقتاستىقتىڭ دامۋ پەرسپەكتيۆالارى تالقىلاندى.
سونداي-اق ايماقتىق كۇن ءتارتىبىنىڭ وزەكتى ماسەلەلەرى، ونىڭ ىشىندە اۋعانستانداعى احۋال ءسوز بولدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ ريك دەمسكە ءىلتيپات بىلدىرە وتىرىپ، ونىڭ ساپارى اتاۋلى داتا – قازاقستان تاۋەلسىزدىگىنىڭ 30 جىلدىعىمەن تۇسپا-تۇس كەلگەنىن اتاپ ءوتتى.
«ءسىزدىڭ ساپارىڭىزدى ءدال ۋاقىتىندا جاسالدى دەپ سانايمىن. ويتكەنى ول بىزگە قول جەتكىزگەن جەتىستىكتەرىمىزدى قورىتىندىلاۋعا جانە ىنتىماقتاستىقتىڭ جاڭا باعىتتارىن پىسىقتاۋعا مۇمكىندىك بەرەدى»، – دەدى پرەزيدەنت.
مەملەكەت باسشىسى ەۋروپا كەڭەسى پارلامەنتتىك اسسامبلەياسىمەن جان-جاقتى ديالوگتى جالعاستىرۋدىڭ ماڭىزدى ەكەنىن اتاپ ءوتتى. سونىمەن قاتار قاسىم-جومارت توقايەۆ ريك دەمسكە ادام قۇقىقتارى مەن زاڭ ۇستەمدىگىن نىعايتۋعا جانە جەمقورلىققا قارسى كۇرەسكە باعىتتالعان قازاقستانداعى دەموكراتيالىق رەفورمالاردىڭ جۇزەگە اسىرىلۋى جونىندە ايتتى.
ەۋروپا كەڭەسى پارلامەنتتىك اسسامبلەياسىنىڭ ءتوراعاسى قازاقستاندا جۇرگىزىلىپ جاتقان ساياسي رەفورمالاردى قۇپتاپ، ەلىمىزدىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قول قويعانىن ەرەكشە اتاپ ءوتتى.