پرەزيدەنت ەلىمىزدىڭ جول قۇرىلىسى سالاسىن سىنعا الدى

جول قۇرىلىسى سالاسىن جەمقورلىق جايلاعان.

بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ءبىز ءبىر اپتا بۇرىن ەلىمىزدىڭ كولىك-ترانزيت الەۋەتىن دامىتۋ ماسەلەلەرى تۋرالى ارنايى جيىن وتكىزدىك. بۇگىن اۆتوجول ينفراقۇرىلىمى سالاسىنداعى تۇيتكىلدەرگە ەرەكشە توقتالعىم كەلەدى. بيىل 11 مىڭ شاقرىمىنان استام جولعا ءارتۇرلى جوندەۋ جۇمىستارى جۇرگىزىلەدى. بۇعان 600 ميلليارد تەڭگەدەن استام قارجى ءبولىندى. جوندەۋ جۇمىستارىن سوزبالاڭعا سالۋعا بولمايدى»، - دەدى قاسىم-جومارت توقايەۆ.

مەملەكەت باسشىسى جوبالاردى جۇزەگە اسىرۋ بارىسىن قاتاڭ باقىلاۋعا الۋ قاجەتتىگىن باسا ايتتى.

«جولدىڭ ساپاسىنا ايرىقشا نازار اۋدارۋ كەرەك. ەلىمىزدىڭ جولدارى ناشار ەكەنى جانە جول قۇرىلىسى سالاسىن جەمقورلىق جايلاعانى ەشكىمگە جاسىرىن ەمەس. ءتىپتى باسقا جەردى ايتپاعاننىڭ وزىندە، اقورداعا اپاراتىن جولدىڭ ءوزى جاماۋ-جاماۋ قۇراق كورپەگە ۇقسايتىن بولدى»، - دەدى قازاقستان پرەزيدەنتى.

پرەزيدەنتتىڭ اتاپ وتۋىنشە، جالپى، بۇل سالادا قوردالانعان ماسەلە كوپ.

«تەندەردى جىل سايىن بىرلى-ەكى كومپانيا عانا ۇتىپ الادى. مۇنداي جاعدايدىڭ قايتالانىپ كەلە جاتقانىنا ونداعان جىل بولدى. سوىنىڭ ءبارىن رەتكە كەلتىرۋ ءۇشىن شۇعىل شارالار قابىلداۋ كەرەك. جارتى جىل ءوتتى. ال جول جوندەۋگە بولىنگەن قاراجاتتىڭ 44 پايىزىنا مەملەكەتتىك ساتىپ الۋ قورىتىندىسى جاسالعان جوق. بۇل جۇمىس پاۆلودار، ماڭعىستاۋ جانە باتىس قازاقستان وبلىستارىندا وتە باياۋ جۇرگىزىلۋدە»، - دەدى قاسىم-جومارت توقايەۆ.