«اقوردا» رەزيدەنسياسىندا ون ءتورت مەملەكەتتىڭ توتەنشە جانە وكىلەتتى ەلشىلەرىنىڭ پرەزيدەنت قاسىم-جومارت توقايەۆقا سەنىم گراموتالارىن تاپسىرۋ ءراسىمى ءوتتى.
سەنىم گراموتالارىن شۆەيساريا كونفەدەراسياسىنىڭ ەلشىسى سالمان بال، ليتۆا رەسپۋبليكاسىنىڭ ەلشىسى ەگيديۋس ناۆيكاس، چەح رەسپۋبليكاسىنىڭ ەلشىسى پاۆول شەپەلياك، ءۇندىستان رەسپۋبليكاسىنىڭ ەلشىسى ناگەندرا پراساد، يوردانيا حاشيميت كورولدىگىنىڭ ەلشىسى حامزا ماحمۋد يۋسەف ءال-وماري، نيدەرلاند كورولدىگىنىڭ ەلشىسى نيكولااس ياكوب سحەرمەرس، قاسيەتتى تاقتىڭ قازاقستانداعى اپوستولدىق ءنۋنسيى دجوردج دجوردج پانامتۋنديل، سلوۆەنيا رەسپۋبليكاسىنىڭ ەلشىسى داريا باۆداج كۋرەت، ۋگاندا رەسپۋبليكاسىنىڭ ەلشىسى موزەس كاۆاالۋۋكو كيزيگە، گانا رەسپۋبليكاسىنىڭ ەلشىسى لەسلي اچا وپوكۋ-ۋارە، شىعىس ۋرۋگۆاي رەسپۋبليكاسىنىڭ ەلشىسى دانيەل رۋبەن كاستيلوس گومەس، ەفيوپيا فەدەراتيۆتىك دەموكراتيالىق رەسپۋبليكاسىنىڭ ەلشىسى ادەم مۇحاممەد ماحمۋد، دانيا كورولدىگىنىڭ ەلشىسى ياكوب حەننينگسەن، نەپال فەدەراتيۆتىك دەموكراتيالىق رەسپۋبليكاسىنىڭ ەلشىسى ميلان رادج تۋلادحار تاپسىردى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
مەملەكەت باسشىسى ديپلوماتتارعا ەلىمىز بۇۇ جارعىسىنىڭ ماقساتتارى مەن قاعيداتتارىنا نەگىزدەلگەن ادىلەتتى الەم ورناتۋ ءتارتىبىن جاقتايتىنىن ايتتى.
«قازاقستان ەلدىڭ قاۋىپسىزدىگى مەن ورنىقتى دامۋىن قامتاماسىز ەتۋگە باعىتتالعان بەيبىت سىرتقى ساياسات جۇرگىزەدى. ءبىز سىزدەردىڭ مەملەكەتتەرىڭىزبەن ءوزارا ءتيىمدى، دوستىق قارىم-قاتىناستاردى كەڭەيتۋگە جانە نىعايتۋعا مۇددەلىمىز»، – دەدى پرەزيدەنت.
قاسىم-جومارت توقايەۆ قازاقستاننىڭ ەكونوميكالىق دامۋ تۇرعىسىنان كەلەشەگى زور ەكەنىن، ەلىمىزدى الەمدىك ەكونوميكانىڭ ماڭىزدى بولىگىنە اينالدىرۋ ءۇشىن بارلىق مۇمكىندىكتى جاسايتىنىن اتاپ ءوتتى.
«ەلىمىز – ورتالىق ازيا وڭىرىندەگى ەكونوميكاسى ەڭ دامىعان مەملەكەت. ءبىراق ءبىز مۇنىمەن توقتاپ قالمايمىز. ەكونوميكامىزدى ودان ءارى ورنىقتى دامىتۋ ءۇشىن بار كۇش-جىگەرىمىزدى جۇمسايمىز»، – دەدى مەملەكەت باسشىسى.
پرەزيدەنت سالتاناتتى ءراسىم سوڭىندا ەلشىلەردى قازاقستانداعى ديپلوماتيالىق ميسسياسىنىڭ رەسمي تۇردە باستالۋىمەن قۇتتىقتاپ، ەكىجاقتى ىنتىماقتاستىقتى ودان ءارى نىعايتۋ ىسىندە تابىس تىلەدى. قاسىم-جومارت توقايەۆ سەنىم گراموتالارىن تاپسىرعان ەلشىلەر مەملەكەتتەرىنىڭ باسشىلارىنا ىزگى تىلەگى مەن سالەمىن جولدادى.