مەملەكەت باسشىسى قاسىم-جومارت توقايەۆ «باتىل تويتارىس-2023» ستراتەگيالىق كوماندالىق-شتابتىق اسكەري وقۋ-جاتتىعۋ جيىنىن بارىپ كوردى.
پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ باسشىلىعىمەن «جاعالاۋ» وقۋ-جاتتىعۋ پوليگونىندا «باتىل تويتارىس-2023» ستراتەگيالىق كوماندالىق-شتابتىق اسكەري وقۋ-جاتتىعۋ جيىنى ءوتتى، دەپ حابارلايدى Almaty-akshamy.kz.
قاسىم-جومارت توقايەۆ وقۋ-جاتتىعۋ جيىنىن باقىلاۋ مۇناراسىنان تاماشالادى.
اسكەري ادىس-تاسىلدەر كورسەتەر الدىندا مەملەكەت باسشىسىنا گەنەرال-مايورلار بولات جورابايەۆ پەن الماز جۇماكەيەۆ قورعانىس وپەراسياسى كەزىندەگى ارناۋلى وپەراسيالار كۇشتەرى مەن دەسانتتىق-شابۋىلداۋ اسكەرلەرىنىڭ ارەكەتى جونىندە باياندادى.
دەسانتتىق-شابۋىلداۋ اسكەرلەرىنىڭ بريگادالىق-تاكتيكالىق توپتارى اۆياسيانىڭ قولداۋىمەن، سونداي-اق قۇرلىق اسكەرلەرى جانە ارناۋلى وپەراسيالار كۇشتەرىنىڭ بولىمشەلەرىمەن بىرلەسە وتىرىپ، سۋدان ءوتۋ ارقىلى قارسى جاعالاۋداعى جاۋ شەبىن باسىپ الۋ ءۇشىن تاكتيكالىق ءىس-قيمىل جۇرگىزدى.
ال ارناۋلى وپەراسيالار كۇشتەرى مەن ۇلتتىق ۇلان بولىمشەلەرى شارتتى جاۋ قولىنا وتكەن قاپشاعاي گەس-ىن ازات ەتتى. توتەنشە جاعدايلار مينيسترلىگىنىڭ بولىمشەلەرى تەحنوگەندىك اپات سالدارىن جويۋمەن اينالىسىپ، حالىققا گۋمانيتارلىق كومەك كورسەتۋ مىندەتىن اتقاردى.
قارۋلى كۇشتەردىڭ باس شتابى ازىرلەگەن ءبىرىڭعاي جوسپار مەن ماقساتقا سايكەس اسكەرلەر وقۋ-جاتتىعۋ جيىنى وتەتىن اۋداندارعا ستراتەگيالىق تۇرعىدا قايتا توپتاستىرىلدى.
اتاپ ايتقاندا، اسكەري-تەڭىز كۇشتەرى اۆياسيانىڭ جانە ارناۋلى وپەراسيالار كۇشتەرىنىڭ قولداۋىمەن كاسپيي تەڭىزى اكۆاتورياسىنداعى ەكونوميكالىق قىزمەت نىساندارىنىڭ قاۋىپسىزدىگىن قامتاماسىز ەتتى.
الماتى، قاراعاندى، سولتۇستىك قازاقستان جانە اباي وبلىستارىنداعى پوليگونداردا دا وسىنداي وقۋ-جاۋىنگەرلىك مىندەتتەر ورىندالدى.