مەملەكەت باسشىسىنا قاڭتار وقيعاسىن تەرگەپ-تەكسەرۋ جۇمىستارىنىڭ بارىسى تۋرالى باياندالعان.
سونىمەن قاتار پرەزيدەنتكە شەتەلدەن اكتيۆتەردى قايتارۋ ءىسى بويىنشا قابىلدانىپ جاتقان شارالار تۋرالى مالىمەت بەرىلدى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
رەزونانس تۋدىرعان قىلمىستىق ىستەر بويىنشا فيگۋرانتتاردىڭ قىلمىستىق جولمەن جيناعان كاپيتالىنىڭ شىعىپ كەتۋىن انىقتاۋ ماقساتىندا ولاردىڭ شەتەلگە جىلىستاتىلۋىنا تالداۋ جاسالۋدا. بەرىك اسىلوۆ قاسىم-جومارت توقايەۆقا جۋىرداعى قازاقستان حالقىنا جولداۋىندا بەرگەن تاپسىرمالارىنىڭ جۇزەگە اسىرىلۋى تۋرالى ايتتى.
اتاپ ايتقاندا، باس پروكۋروردىڭ كونستيتۋسيالىق سوتقا جۇگىنۋ قۇقىعى تۋرالى كونستيتۋسيانىڭ 83-بابىنا ەنگىزىلەتىن تۇزەتۋلەر دايىندالۋدا، سونداي-اق «پروكۋراتۋرا تۋرالى» جاڭا كونستيتۋسيالىق زاڭ ازىرلەۋ باستالدى. سالالىق زاڭنىڭ باستى باسىمدىعى – ازاماتتاردىڭ كونستيتۋسيالىق قۇقىقتارى مەن بوستاندىقتارىن قورعاۋ.
زاڭ جوباسىنا ادام قۇقىقتارى جونىندەگى ۋاكىلمەن، قۇقىق قورعاۋشىلارمەن جانە ازاماتتىق قوعاممەن ءوزارا ءىس-قيمىل جاساۋ، پروكۋرورلاردىڭ دەربەستىگى مەن جاۋاپكەرشىلىگىن ارتتىرۋ تەتىگى تۋرالى ەرەجەلەردى ەنگىزۋ جوسپارلانىپ وتىر.
بۇدان بولەك، پرەزيدەنتكە ازاپتاۋلاردى تەرگەپ-تەكسەرۋ بويىنشا پروكۋرورلارعا وكىلەتتىك بەرۋگە، وتباسى-تۇرمىستىق زورلىق-زومبىلىقتار ءۇشىن جاۋاپكەرشىلىكتى كۇشەيتۋگە قاتىستى تاپسىرمالاردىڭ ورىندالۋى تۋرالى ايتىلدى.
قاسىم-جومارت توقايەۆ قاداعالاۋ ورگانىنىڭ حالىقپەن ءوزارا ىقپالداستىعىن جانداندىرۋدىڭ ماڭىزدى ەكەنىن اتاپ ءوتىپ، باس پروكۋرورعا ءبىرقاتار تاپسىرما بەردى.