قازاقستان جاھاندىق جانە وڭىرلىك سەرىكتەستەرىمەن دوستىق قاتىناستى ۇستانۋعا بار كۇش-جىگەرىن سالادى.
بۇل تۋرالى استانا حالىقارالىق فورۋمىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz.
«ءبىزدىڭ ەلىمىز بارلىق ۋاقىتتا بەيبىتشىلىك پەن حالىقارالىق قاۋىپسىزدىكتى نىعايتۋ جولىندا بار كۇشىن سالادى. ءبىز يادرولىق قارۋسىزدانۋدى قولدايمىز جانە يادرولىق قارۋدى تاراتپاۋ تۋرالى كەلىسىمدى ۇستانامىز. ءبىزدىڭ ەلىمىز سيريا داعدارىسىن شەشۋ ءۇشىن استانا بەيبىت ۇدەرىسىنە باستاماشى بولدى. ەلوردامىز الەمدىك دىندەر كوشباسشىلارىنىڭ سەزدەرىن وتكىزەتىن تۇراقتى ورىنعا اينالدى. شتاب-پاتەرى استانادا ورنالاسقان ازياداعى ءوزارا ءىس-قيمىل جانە سەنىم شارالارى جونىندەگى كەڭەس وڭىرلىك جانە جاھاندىق پروبلەمالاردى شەشۋدىڭ بەدەلدى تەتىگىنە اينالدى»، - دەدى پرەزيدەنت.
قاسىم-جومارت توقايەۆ قازاقستان اۋعانستانداعى گۋمانيتارلىق داعدارىستى ەڭسەرۋگە بەلسەندى قاتىسىپ كەلە جاتقاندىعىن باسا ايتتى.
«بۇۇ قامقورلىعىمەن اۋعان حالقىنا جان-جاقتى كومەك كورسەتۋدى ودان ءارى ارتتىرۋ قاجەتتىگىن اتاپ وتكىم كەلەدى. بۇل تۇرعىدا الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن قۇرۋ ماڭىزدى. قازاقستان جاھاندىق جانە وڭىرلىك سەرىكتەستەرىمەن دوستىق قاتىناستى ۇستانۋعا بار كۇش-جىگەرىن سالادى. جانە دە ءبىز ورتالىق ازياداعى باۋىرلاس ەلدەرمەن وڭىرلىك ىنتىماقتاستىقتى ارتتىرۋعا نيەتتىمىز»، - دەدى مەملەكەت باسشىسى.