مەملەكەت باسشىسى قاسىم-جومارت توقايەۆ Egemen Qazaqstan گازەتىنە بەرگەن سۇحباتىندا ەكى جىلدان كەيىن پرەزيدەنت سايلاۋى وتەتىنى تۋرالى قاۋەسەتتى تەرىسكە شىعاردى.
سۇحبات الۋشى «قازاق گازەتتەرى» ج ش س باس ديرەكتورى ديحان قامزابەك ۇلى پرەزيدەنت كونستيتۋسياعا قاتىستى رەفەرەندۋم وتكىزىپ، 2026 جىلى تاعى دا سايلاۋعا تۇسەدى دەگەن قاۋەسەتتىڭ راس-وتىرىگىن سۇرادى، دەپ حابارلايدى Almaty-akshamy.kz.
«بۇل – جالعان اقپارات. بۇدان بىلاي اركىم ويىنا كەلگەنىن ىستەپ، اتا زاڭعا وڭدى-سولدى وزگەرىس ەنگىزە المايدى. ال وسىنداي ماڭىزدى ماسەلەگە كەلگەندە، ءتىپتى مۇمكىن ەمەس. مەن بۇعان نىق سەنىمدىمىن. كونستيتۋسيالىق رەفورما اتا زاڭعا قالاي بولسا سولاي وزگەرىس ەنگىزە بەرۋ ءۇشىن جاسالعان جوق. پرەزيدەنت لاۋازىمىنا ءبىر-اق رەت سايلانۋ تۋرالى ەرەجە ەندى ەشقاشان وزگەرمەيدى. بۇل تالاپ مەملەكەتىمىزدىڭ تاۋەلسىزدىگى، ءبىرتۇتاستىعى، اۋماقتىق تۇتاستىعى جانە باسقارۋ نىسانى تۋرالى نورمالار سياقتى مىزعىماستاي ەتىپ بەكىتىلگەن»، - دەپ جاۋاپ بەردى قاسىم-جومارت توقايەۆ.
پرەزيدەنت جەتىجىلدىق ءبىر عانا مەرزىم تۋرالى يدەيانى وسىدان 15 جىل بۇرىن جابىق پىكىرتالاستاردا ايتىپ جۇرگەنىن اتاپ ءوتتى.
«سول كەزدە ۇسىنىس اسا قولداۋ تابا قويمادى. ءوزىم پرەزيدەنت بولىپ سايلانعاننان كەيىن، وسى باستامامنىڭ ارتىقشىلىعى مەن كەمشىلىگىن ابدەن سالماقتاپ، ونى قالاي جۇزەگە اسىرۋعا بولاتىنى جونىندە كوپ ويلادىم. سۋپەرپرەزيدەنتكە ءتان وكىلەتتىكتەردى جويۋ ءۇشىن 2022 جىلى كونستيتۋسياعا ءبىرقاتار ماڭىزدى وزگەرىس ەنگىزىلدى. مەن سول كەزدە جەتىجىلدىق ءبىر مەرزىم يدەياسىن قايتا ۇسىندىم. باستاماما بۇكىل حالىق قولداۋ ءبىلدىردى. وسىمەن بۇل اڭگىمە ءتامام»، - دەيدى مەملەكەت باسشىسى.