ەلەكتروندىق ساۋدا كەزىندە سالىق سالۋ ماسەلەلەرىن تالقىلاۋ جوسپارلانىپ وتىر
پرەمەر-مينيستر ءاليحان سمايىلوۆ باستاعان قازاقستان رەسپۋبليكاسى ۇكىمەتىنىڭ دەلەگاسياسى ەۋرازيالىق ۇكىمەتارالىق كەڭەستىڭ كەزەكتى وتىرىسىنا قاتىسۋ ءۇشىن مينسك قالاسىنا كەلدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
شاراعا ارمەنيانىڭ ۇكىمەت باسشىسى نيكول پاشينيان، بەلارۋس ۇكىمەتىنىڭ باسشىسى رومان گولوۆچەنكو، قىرعىزستاننىڭ ۇكىمەت باسشىسى اكىلبەك جاپاروۆ، رەسەيدىڭ ۇكىمەت باسشىسى ميحايل ميشۋستين، ەۋرازيالىق ەكونوميكالىق كوميسسيا القاسىنىڭ ءتوراعاسى ميحايل مياسنيكوۆيچ جانە ت.ب. قاتىسادى.
شاعىن جانە كەڭەيتىلگەن قۇرامدا وتەتىن كەڭەس وتىرىستارىندا ەۋرازيالىق ەكونوميكالىق وداقتىڭ بىرىكتىرىلگەن اقپاراتتىق جۇيەسىن دامىتۋ، تاۋارلاردى تاڭبالاۋدى جۇرگىزۋ، الكوگول نارىعىن رەتتەۋ جانە ەلەكتروندىق ساۋدا كەزىندە سالىق سالۋ ماسەلەلەرىن تالقىلاۋ جوسپارلانىپ وتىر.
بۇدان بولەك، وتىرىسقا قاتىسۋشىلار «شىعىس-باتىس» جانە «سولتۇستىك-وڭتۇستىك» باعىتتارىندا، ونىڭ ىشىندە قىتايدىڭ «ءبىر بەلدەۋ، ءبىر جول» باستاماسى اياسىندا ەاەو-نىڭ كولىك ينفراقۇرىلىمىن دامىتۋدى، ونەركاسىپتىڭ جوعارى تەحنولوگيالىق سالالارىنداعى كووپەراسيانى، تۇتىنۋشىلاردىڭ قۇقىقتارىن قورعاۋ سالاسىنداعى بىرلەسكەن ءىس-قيمىل باعدارلاماسىن، ترانسشەكارالىق نارىقتارداعى باسەكەلەستىكتىڭ جاي-كۇيىن جانە باسقا دا ءبىرقاتار ماسەلەنى تالقىلايدى.
وتىرىس قورىتىندىسى بويىنشا قابىلدانعان شەشىمدەردى بەكىتەتىن كوپ جاقتى قۇجاتتارعا قول قويىلماق.