ەرتەڭ، ياعني 7 تامىزدا الماتى قالاسى اكىمدىگىنىڭ جانە قازاقستان رەسپۋبليكاسىنىڭ چەح رەسپۋبليكاسىنداعى ەلشىلىگى، پراگا قالاسىنىڭ مەرياسى جانە پراگا قالاسى مۋزەيىنىڭ قولداۋىمەن الماتى قالاسى تاريحى مۋزەيىنىڭ «ۋاقىت كەرۋەنى» اتتى حالىقارالىق كورمە اشىلادى.
ۇيىمداستىرۋشى – الماتى قالاسى مۋزەيلەر بىرلەستىگى مەن پراگا قالاسى مۋزەيى. 2024 جىلى ەكى مۋزەي اراسىندا ىنتىماقتاستىق جونىندەگى مەموراندۋمعا قول قويىلعان بولاتىن.
قازاقستان رەسپۋبليكاسى مەن چەح رەسپۋبليكاسى اراسىنداعى ديپلوماتيالىق قاتىناستار 1993 جىلى 1 قاڭتاردا قۇرىلدى. جىل وتكەن سايىن ەكى ەل اراسىنداعى مادەني بايلانىس نىعايىپ كەلەدى. اشىلعالى وتىرعان كورمە – وسى ىنتىماقتاستىقتىڭ ناقتى كورىنىسى.
كورمەنىڭ ماقساتى – قازاقستان رەسپۋبليكاسى مەن چەح رەسپۋبليكاسى اراسىنداعى مادەني بايلانىستاردى ودان ءارى نىعايتۋ، سونداي-اق ۇلى دالا حالقىنىڭ تاريحى مەن مادەنيەتىمەن – جالپى كوشپەندىلەر مادەنيەتىمەن، اتاپ ايتقاندا كوشپەلى قازاقتاردىڭ داستۇرلەرىمەن، تۇرمىسىمەن، فيلوسوفياسىمەن جانە دۇنيەتانىمىمەن تانىستىرۋ.
الماتى قالاسى تاريحى مۋزەيىنىڭ «ۋاقىت كەرۋەنى» كورمەسى كەلۋشىلەردى ۇلى دالانى مەكەندەگەن حالىقتىڭ تەرەڭ تاريحى مەن مادەنيەتىمەن تانىستىرىپ، ەكى ەل اراسىنداعى مادەني ديالوگتى جالعاستىرادى. كورمەگە الماتى قالاسى مۋزەيلەر بىرلەستىگى قورىنان 220-دان استام ەكسپونات قويىلادى. كورمە قازاق حالقىنىڭ تۇرمىسىن، ءسالت-داستۇرىن، قولدانبالى ونەرىن باياندايتىن ەتنوگرافيالىق جادىگەرلەر، مۋزىكالىق اسپاپتار مەن الماتى قالاسىنىڭ تاريحى مەن قازىرگى ءومىرىن كورسەتەتىن فوتوسۋرەتتەرگە نەگىزدەلگەن.
الماتى قالاسى مۋزەيلەر بىرلەستىگى قازاقستاننىڭ قوعامدىق جانە مادەني ومىرىنە بەلسەندى قاتىسادى. ونىڭ ۇلەسىندە 2022-2024 جىلدارى ەرەكشە دامىعان حالىقارالىق ىنتىماقتاستىقتىڭ كەڭ باعدارلاماسى بار. ماسەلەن، بۇعان دەيىن سەۋل (كورەيا رەسپۋبليكاسى)، ستامبۋل (تۇركيا)، نەاپول (يتاليا) جانە ۆەنا (اۆستريا) قالالارىندا ۇلكەن جەتىستىكپەن وتكىزىلگەن حالىقارالىق كورمەلەردى اتاۋعا بولادى.