كولىك سالاسىنىڭ ساراپشىسى رۋسلان مۋحومەدياروۆ پۋشكين كوشەسىنەن سەيفۋللين داڭعىلىنا دەيىنگى جوبانى تالقىلاۋ بارىسىندا قۇرىلىس جۇمىستارىن وسى كۇزدە ەمەس، كەلەسى جىلدىڭ ءساۋىر ايىندا باستاۋدى ۇسىندى. ساراپشىنىڭ پىكىرىنشە، بۇل كولىك كوللاپسىنان قۇتقارادى.
«بۇل جوبا كۇزدە كولىك كوللاپسىن تۋدىرماۋى كەرەك. قوزعالىسقا كەدەرگى كەلتىرمەيتىن جانە جول-كوشە جەلىسىن تارىلتپايتىن جۇمىستاردى بىرتىندەپ باستاۋ كەرەك، ولار ءقازىر جۇرگىزىلۋى ءتيىس، ال نەگىزگى جۇمىستار كەلەسى ماۋسىمدا بولۋى كەرەك. بۇل دۇرىس قابىلدانعان شەشىم»، - دەدى ساراپشى.
سونىمەن قاتار، ول قازىرگى زامانعى تەحنولوگيا كەز كەلگەن اۋا رايىندا جول جۇمىستارىن جۇرگىزۋگە مۇمكىندىك بەرەتىنىنە قاراماستان، باستى اسپەكت – جاڭا وقۋ جىلىنىڭ باستالۋىمەن كولىك سانىنىڭ ارتۋى ەكەنىن اتاپ ءوتتى.
«ماگيسترالدى كوشەدە قولدان پروبلەما تۋعىزۋ – بۇل دۇرىس ەمەس. ادامدارعا دۇرىس كوزقاراسپەن قاراپ، ساۋاتتى جۇمىس ىستەۋ قاجەت»، - دەيدى رۋسلان مۋحومەدياروۆ.
سول ۋاقىتتا ساراپشى الينا بيسەمبايەۆا جوبانى جۇزەگە اسىرۋعا وتە مۇقيات قاراۋدىڭ ماڭىزدىلىعىن اتاپ ءوتتى.
«قىس مەزگىلىندە جۇمىس ىستەۋ الدەقايدا قيىن، سوندىقتان جۇمىستى ازداپ كۇزدە باستاۋعا بولادى، ءبىراق كوشە جەلىسىنە، اسىرەسە جول جامىلعىسىنا تيىسپەگەن ءجون»، - دەيدى ول.
جالپى، ساراپشىلار رايىمبەك داڭعىلى بويىنداعى BRT ءدالىزىنىڭ ءبىرىنشى ۋچاسكەسىنىڭ ۇسىنىلعان جوباسىن جوعارى باعالاپ، ونىڭ مەگاپوليس تۇرعىندارىنىڭ موبيلدىلىگىن ارتتىرۋ جانە قالالىق قوعامدىق كولىك جۇيەسىن دامىتۋ ءۇشىن ماڭىزدىلىعىن اتاپ ءوتتى.
ساراپشىلار قاۋىمداستىعىنىڭ پىكىرىن ەسكەرە وتىرىپ جانە قالا تۇرعىندارى ءۇشىن قولايسىزدىقتى بارىنشا ازايتۋ ماقساتىندا BRT جوباسىن بىرنەشە كەزەڭدە جۇزەگە اسىرۋ تۋرالى شەشىم قابىلداندى. مىسالى، قۇرىلىس-مونتاجداۋ جۇمىستارىن كەلەسى جىلدىڭ ءساۋىر ايىندا باستاۋ كەرەك.
«ءبىز رايىمبەك باتىر داڭعىلى – 70 مىڭنان استام كولىك جۇرەتىن ۇلكەن ماگيسترالدىڭ ءبىرى ەكەنىن جاقسى تۇسىنەمىز، سوندىقتان بيىل كولىك قوزعالىسىنا كەدەرگى كەلتىرمەيتىن دايىندىق جۇمىستارىن باستايمىز. كەلەسى جىلى جۇمىستاردى احريمەنكو كوشەسى جاعىنان جانە پۋشكين كوشەسى جاعىنان پاراللەلدى ادىسپەن باستايمىز»، - دەدى الماتى قالالىق موبيلدىلىك باسقارماسىنىڭ باسشىسى ساعىندىق تەلىبايەۆ.