ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىندە قازاقستاننىڭ حالىق سۋرەتشىسى سابىر ءابدىراسىل ۇلى مامبەيەۆتىڭ (1928-2017) «شەبەردىڭ كەسكىندەمەسىندەگى پورترەت» اتتى جەكە كورمەسى اشىلادى. ەكسپوزيسيادا سۋرەتشىنىڭ وتباسىلىق قورىنان الىنعان جيىرمادان استام كەسكىندەمەلىك تۋىندىسى قويىلادى.
قازاقستاننىڭ حالىق سۋرەتشىسى سابىر ءابدىراسىل ۇلى مامبەيەۆ – 1950 جىلدارداعى قازاقستان بەينەلەۋ ونەرى بۋىنىنىڭ وكىلى. سول جىلدارى قازاق بەينەلەۋ ونەرىنىڭ ورلەۋى ماسكەۋ، لەنينگراد، حاركوۆ، كييەۆ قالالارىنداعى كوركەمونەر جوعارى وقۋ ورىندارىندا ءبىلىم العان ك. تەلجانوۆ، م. كەنبايەۆ، گ. يسمايلوۆا، ا. عالىمبايەۆا، ك. شاياحمەتوۆ، س. مامبەيەۆ جانە باسقا دا دارىندى سۋرەتشىلەردىڭ كەلۋىمەن بايلانىستى بولدى. كاسىبي ءبىلىم العان قازاق سۋرەتشىلەرى بەينەلەۋ ونەرىنە جاڭاشا ءۇن قوستى. كەسكىندەمە سالۋ تاسىلدەرى ءداستۇرلى رۋحاني-كوركەم قۇندىلىقتارمەن بايىتىلىپ، سۋرەتشىلەردىڭ شىعارماشىلىعى ۇلتتىق كولوريتپەن جاڭعىرتىلدى.
– سابىر مامبەيەۆ بەينەلەۋ ونەرىندە ۇلتتىق كەسكىندەمە ءتىلى مەن وزىندىك مانەرىن تابۋعا ۇمتىلعان العاشقى قازاق سۋرەتشىلەرىنىڭ ءبىرى بولدى. بيىلعى كورمە سۋرەتشىنىڭ شىعارماشىلىعىنداعى پورترەت جانرىنا ارنالادى. بۇل تۋىندىلاردىڭ اراسىندا كورەرمەندەر نازارىنا العاش رەت ۇسىنىلىپ وتىرعان جۇمىستار دا بار، – دەيدى كورمە جەتەكشىسى، مۋزەيدىڭ «قازاقستان بەينەلەۋ ونەرى» ءبولىمىنىڭ اعا عىلىمي قىزمەتكەرى ل. ابىلدايەۆا.
سابىر ءابدىراسىل ۇلى 1946 جىلى الماتى كوركەمونەر ۋچيليششەسىن، 1953 جىلى كسرو كوركەمونەر اكادەمياسىنىڭ ي. ە. رەپين اتىنداعى لەنينگراد كەسكىندەمە، ءمۇسىن جانە ساۋلەت ينستيتۋتىن ءتامامدادى. الماتى كوركەمونەر ۋچيليششەسىندە ساباق بەردى. 1963 جىلى «قازاق كسر-نىڭ ونەرىنە ەڭبەك سىڭىرگەن قايراتكەر» اتاعىن الدى. 1978 جىلى «حالىقتار دوستىعى» وردەنىمەن ماراپاتتالدى. 1980 جىلى «قازاق كسر حالىق سۋرەتشىسى» اتاعىنا يە بولدى. بىرنەشە رەت قازاقستان سۋرەتشىلەر وداعىنىڭ ءتوراعاسى بولىپ سايلاندى.
كورمە 8 قازان كۇنى اشىلىپ، 27 قازانعا دەيىن جالعاسادى.