بيللي دجين كينگ كۋبوگىنىڭ (كوماندالىق الەم چەمپيوناتى) ىرىكتەۋ كەزەڭى اياسىندا ۇلتتىق تەننيس ورتالىعىندا قازاقستان – پولشا ماچى ءوتىپ جاتىر، دەپ حابارلايدى اlmaty-akshamy.kz قازاقپاراتقا سىلتەمە جاساپ.
كورتقا العاشقى بولىپ قازاقستاننان الەمنىڭ 45-راكەتكاسى يۋليا پۋتينسيەۆا مەن پولشا قۇراماسىنان دۇنيەجۇزىلىك رەيتينگتە 19-ورىندا تۇرعان ماگدا لينەتت شىقتى.
وسىعان دەيىن قارسىلاستار ءوزارا جەتى رەت كەزدەسىپ، سونىڭ بەسەۋىندە ماگدا جەڭىسكە جەتكەن.
الەمنىڭ 1-راكەتكاسى يگا شۆەنتەك استاناعا كەلە الماعاندىقتان، م.لينەتتىڭ ءوز كومانداسىنىڭ كوشباسشىسى سانالۋى زاڭدى ەدى.
ءبىرىنشى پارتيادا پولياك سپورتشىسى 4:0 ەسەبىمەن العا كەتتى. تەك سودان كەيىن عانا يۋليا ەسەپتى قىسقارتتى – 2:4. ماگدا ەسەپ 5:2 بولىپ، سەتكە دوپ بەرگەندە، ءوز مۇمكىندىگىن پايدالانا المادى. بۇدان سوڭ قازاقستاندىق تەننيسشى كۇش الدى – 7:5.
قاتارىنان جەتى گەيمدى ءوز ەسەبىنە جازعان يۋ.پۋتينسيەۆا ەكىنشى سەتتى دە ءساتتى باستادى – 2:0. سودان سوڭ تاعى ءبىر برەيك جاساپ، 4:1-گە جەتكىزگەنىمەن، لينەتت سول بويدا قايتا قىسقارتتى. دەگەنمەن يۋ.پۋتينسيەۆا باسەكەنى تاعى ءبىر برەيكپەن تۇيىندەدى – 6:3.
ءبىر ساعات 46 مينۋتقا سوزىلعان كەزدەسۋ بارىسىندا يۋ.پۋتينسيەۆا 8 برەيك-پوينتتىڭ التاۋىن پايدالاندى.
وسىلايشا، قازاقستان 1:0 ەسەبىمەن العا شىقتى.
بۇگىن سونداي-اق قازاقستاننىڭ ءبىرىنشى، الەمنىڭ 7-راكەتكاسى ەلەنا رىباكينا مەن رەيتينگتە 253-ساتىداعى ۆەرونيكا فالكوۆسكا شەبەرلىك بايقاسادى.
قالعان باسەكەلەر ەرتەڭ جالعاسادى. ءۇش جەڭىسكە قول جەتكىزگەن كوماندا الەم چەمپيوناتىنا جولداما الادى.
