پوليسيا ءىستى جاۋىپ تاستاعان: تاعى ءبىر بالانىڭ ءتىس ەمدەتىپ، قازا تاپقانى اشكەرە بولدى

الماتىدا جەكە ستوماتولوگيادا ءتىس ەمدەمەك بولعان ءۇش جاسار بالا قايتىس بولدى، - دەپ حابارلايدى اqshamnews.kz ءتىلشىسى Tengrinews.kz-كە سىلتەمە جاساپ.

اتا-اناسى بالانىڭ ولىمىنە دارىگەرلەردىڭ ارەكەتى سەبەپ بولدى دەپ ساناپ، پوليسياعا ارىز جازعان. الايدا ەكى ايدان كەيىن قىلمىستىق ءىس جابىلعان.

جاعدايدىڭ جاي-جاپسارى

بالا 13 ساۋىردە تاڭەرتەڭ ستوماتولوگيالىق وپەراسياعا جەتكىزىلگەن. تۋىستارىنىڭ ايتۋىنشا، دارىگەرلەر 20 ءتىس ەمدەۋ قاجەت ەكەنىن ايتىپ، پروسەدۋرا شامامەن 4 ساعاتقا سوزىلادى دەپ حابارلاعان.

الايدا وپەراسيا «سيەۆوران» پرەپاراتىمەن 5،5 ساعاتتان استام ۋاقىتقا سوزىلعان. ساعات 13:30 شاماسىندا بالانى وپەراسيا بولمەسىنەن الىپ شىققاندا، ول ءالسىز كۇيدە بولعان. دارىگەرلەر ونى باقىلاۋدا قالدىرماستان، اتا-اناسىنا ۇيىنە الىپ كەتۋگە رۇقسات بەرگەن.

ۇيدە جاعدايى ناشارلاپ، بالا قايتىس بولعان

بالا ۇيگە كەلگەننەن كەيىن ەسىن تولىق جيماعان. كەشكە قاراي جاعدايى كۇرت ناشارلاپ، وعان قۇرىسۋى باستالعان، دەنەسى كوگەرگەن.

"جەدەل جاردەم ۇزاق ۋاقىت كەلمەدى. اتا-اناسى وزدەرى بالانى اۋرۋحاناعا جەتكىزدى، ءبىراق دارىگەرلەر ءومىرىن ساقتاپ قالا المادى"، - دەيدى بالانىڭ تاتەسى.

بالا سول كۇنى 13 ساۋىردە كوز جۇمعان.

قىلمىستىق ءىس ەكى ايدان كەيىن جابىلعان

وقيعادان كەيىن پوليسيا قىلمىستىق ءىس قوزعاعانىمەن، تۋىستارىنىڭ ايتۋىنشا، ءىس ەكى ايدان سوڭ جابىلىپ قالعان. وتباسىعا بۇل تۋرالى ەشكىم حابارلاماعان، ولار ءىستىڭ توقتاتىلعانىن اكەسىنىڭ ءاىىب-عا ءوز بەتىمەن بارعانىندا ءبىر-اق بىلگەن.

تۋىستارى ءىستىڭ ءۇستىرت تەكسەرىلگەنىن ايتىپ، نارازىلىق ءبىلدىرىپ جاتىر.

اتا-انانىڭ كلينيكاعا شاعىمى

وتباسى ستوماتولوگياعا سوتقا دەيىنگى شاعىم جولداعان. ايتۋلارىنشا، وپەراسيادان كەيىن بىرنەشە رەت كلينيكاعا حابارلاسىپ، بالانىڭ جاعدايىنىڭ ناشارلاعانىن ايتقان، ءبىراق قىزمەتكەرلەر «ءبارى قالىپتى» دەپ سەندىرگەن.

اتا-اناسى پروسەدۋرانى جۇرگىزگەن دارىگەرگە قوڭىراۋ شالا الماعان. ول تەك مەسسەندجەر ارقىلى جازباشا جاۋاپ بەرگەن.

ساراپتاما قورىتىندىسى داۋلى بولىپ وتىر

سوت-مەديسينالىق ساراپتاما بالانىڭ ولىمىنە ميدىڭ ىسىنۋىمەن بىرگە دامىعان ەنسەفالوپاتيا، ونى تۋدىرعان جەدەل جرۆي جانە بۇيرەك جەتكىلىكسىزدىگى سەبەپ بولعانىن كورسەتكەن.

تۋىستارى بۇل تۇجىرىممەن كەلىسپەيدى:

• وپەراسيا الدىندا بالادان الىنعان قان تالداۋى ورۆي بەلگىلەرىن راستاماعانىن ايتادى؛

• بالادا ەشقانداي اۋرۋدىڭ بەلگىسى بولماعان؛

• "باستى سەبەپ ۇزاق ناركوزدان" دەپ وتىر

پوليسيانىڭ جاۋابى

الماتى پوليسيا دەپارتامەنتى قازىرگى تاڭدا ءىستى جان-جاقتى جانە وبەكتيۆ تەكسەرۋ ءۇشىن قوسىمشا تەرگەۋ شارالارى ءجۇرىپ جاتقانىن حابارلادى. ءىس ماتەريالدارى ساراپتاما ءۇشىن قوعامدىق دەنساۋلىق ساقتاۋ دەپارتامەنتىنە جىبەرىلگەن.

كلينيكا نە دەيدى؟

كلينيكانىڭ ادۆوكاتى ەلەنا جاناتوۆانىڭ ايتۋىنشا، بالانى وپەراسياعا الۋعا قارسى كورسەتىلىم بولماعان.

"جاعدايى تۇراقتى بولدى، جرۆي بەلگىلەرى انىقتالعان جوق. ءبىر جاسقا دەيىنگى بالالاردا ءبىر رەتتە كوپ ءتىستى ەمدەۋ - الەمدىك تاجىريبە"، - دەيدى ول.

ادۆوكاتتىڭ ايتۋىنشا، بارلىق كورسەتكىشتەر پروسەدۋرا بارىسىندا تۇراقتى بولىپ، وپەراسيادان كەيىن بالا ەسىن جيعان، انەستەزيولوگ تەكسەرىپ، ۇيىنە جىبەرگەن. مەديسينالىق قۇجاتتار تۇگەل تەرگەۋ ورگاندارىنا تاپسىرىلعان.

ەسكە سالايىق، بۇعان دەيىن استانادا 18 ءتىستى ناركوزبەن ەمدەتكەن 3 جاسار قىز ويانباي، قايتىس بولعان ەدى. بۇل ءىس بويىنشا ءقازىر سوت ءوتىپ جاتىر.