ەلوردادا پوليسيا قىزمەتكەرلەرى ەر ادامنان ءىرى كولەمدە كوكاين تاركىلەدى
ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى پەتروۆ كوشەسىنىڭ بويىندا Haval اۆتوكولىگىنىڭ جۇرگىزۋشىسىن ۇستادى، ءتىنتۋ بارىسىندا ونىڭ كۇرتەسىنىڭ قالتاسىنان ىشىندە ۇنتاق ءتارىزدى زاتى بار پوليەتيلەندى 30 وراما تابىلىپ، تاركىلەندى.
كولىكتى تەكسەرۋ كەزىندە ءتارتىپ ساقشىلارى وسىنداي تاعى 76 ورامانى تاپتى. 33 جاستاعى ەر ادام ينتەرنەت-دۇكەندە ەسىرتكىنى وراپ، جيناپ جانە تاراتۋمەن اينالىسقانىن مويىندادى.
كۇدىكتىنىڭ تۇرعىلىقتى جەرىندە قوقىس كونتەينەرىنىڭ جانىنان ەسىرتكى زاتتارىن جاسىرعان ورىن انىقتالدى. ۇلكەن سومكەنىڭ ىشىنەن تارازىلار، ZipLock قالتاشالارى، جابىسقاق تاسپا مەن ەسىرتكى تابىلدى.
ساراپتاما ناتيجەلەرىنە سايكەس تاركىلەنگەن ەسىرتكى سالماعى 43،23 گرامم كوكاين، 600 گرامم مەفەدرون، 100 گرامم الفا- PVP ەكەنى انىقتالدى. اتالمىش فاكت بويىنشا قىلمىستىق ءىس قوزعالدى.
ۇستالعان ازامات ۋاقىتشا ۇستاۋ يزولياتورىنا قامالدى.