پوليسيا الاياقتاردىڭ ەڭ كوپ قولداناتىن 10 ايلاسىن ايتتى، - دەپ حابارلايدى اqshamnews.kz ءتىلشىسى.
1. جالعان ءقاۋىپ تۋدىرىپ، ادامدى شاتاستىرادى.
“اقشاڭىزدى ساقتاۋ ءۇشىن ونى باسقا شوتقا اۋدارىڭىز نەمەسە دەپوزيتتەن شەشىپ، باسقا شوتقا سالىڭىز”.
2. جالعان بەدەلگە سۇيەنىپ، قىسىم جاسايدى.
“سىزبەن تەرگەۋشى نەمەسە ءىىم، ۇقك قىزمەتكەرى سويلەسىپ تۇر. تۇتقانى قويماڭىز”.
3. جابىرلەنۋشىنى وقشاۋلاپ، كەڭەس الۋىنا كەدەرگى جاسايدى.
“بۇل قوڭىراۋ تۋرالى ەشكىمگە ايتپاڭىز — قۇپيا وپەراسيا جۇرگىزىلىپ جاتىر”.
4. شوت قولجەتىمسىز بولادى دەگەن وي سالادى.
“كىلت ءسوزدى وزگەرتۋگە ءوتىنىم ءتۇستى”.
5. SIM-كارتانى نەمەسە بانك جۇيەسىن ۇرلاۋ ءۇشىن قولدانىلادى.
“مەن بايلانىس وپەراتورىنىڭ قاۋىپسىزدىك قىزمەتىنەنمىن. ءقازىر سىزگە كود كەلەدى، سونى ايتىپ جىبەرىڭىز”.
6. اقشانى ءوز شوتتارىنا اۋدارتادى.
“دەپوزيتتەگى قاراجاتتى بانك شوتىنا اۋدارۋ قاجەت”.
7. بارلىق مالىمەتتەردى جيناپ، كەيىن اقشا ۇرلايدى.
“بۇل – ۇلتتىق قاۋىپسىزدىك قىزمەتكەرى. قاي بانكتە شوتتارىڭىز بارىن ايتىڭىز. كارتا مەن دەپوزيتتى دەرەۋ بۇعاتتاۋ ءۇشىن دەرەكتەرىڭىزدى بەرىڭىز”.
8. ەموسياعا بەرىلىپ، ۋاقىت ارقىلى قىسادى.
"جاقىنىڭىز قيىن جاعدايعا ءتۇستى (جول اپاتى، پوليسيا، اۋرۋحانا). شۇعىل اقشا جىبەرۋ كەرەك”.
9. جالعان پايدا ۇسىنىپ، اقشا بوپسالايدى.
"ءسىز سىيلىق/وتەماقى ۇتىپ الدىڭىز! ونى الۋ ءۇشىن سالىقتى نەمەسە جەتكىزۋ اقىسىن تولەۋىڭىز كەرەك”.
10. قۇپيا كودتى الداپ الادى.
“شوتىڭىزدان اقشا شەشۋگە ارەكەت جاسالدى. وپەراسيانى توقتاتۋ ءۇشىن SMS-كودتى ايتىڭىز”.
مۇنداي قوڭىراۋلاردىڭ ماقساتى:
- كليەنتتىڭ ءموبيلدى قوسىمشاسىنا قول جەتكىزۋ؛
- اقشانى “قورعالعان شوتقا” ءوز ەركىمەن اۋدارتقىزۋ؛
- TeamViewer، AnyDesk، RustDesk، Hoptodesk، RudeDesktop سەكىلدى قاشىقتان باسقارۋ باعدارلامالارىن ورناتۋعا كوندىرۋ.
پوليسيا قازاقستاندىقتارعان كەڭەس بەردى:
ەشقاشان CVV، PIN، كارتانىڭ تولىق دەرەكتەرىن، SMS-كودتاردى ەشكىمگە ايتپاڭىز! پوليسيا، بانك نەمەسە بايلانىس وپەراتورلارى اقشا نەمەسە كود سۇرامايدى.