3 كۇدىكتى قاماۋعا الىندى
تۇركىستان وبلىسى پد كريمينالدىق پوليسيا قىزمەتكەرلەرى ارنايى وپەراسيا جۇرگىزۋ ناتيجەسىندە وبلىستىڭ 3 اۋدانىنىڭ اۋماعىندا بالىق رەسۋرستارىن زاڭسىز وندىرۋمەن اينالىسقان كۇدىكتىلەردىڭ جولىن كەستى، دەپ حابارلايدى Almaty-akshamy.kz.
تۇركىستان وبلىسى پد باستىعىنىڭ ورىنباسارى پوليسيا پولكوۆنيگى قۇرمانبەك ساحوۆتىڭ ايتۋىنشا، كۇدىكتىلەر بالىق اۋلاۋعا قاجەتتى بارلىق قۇرال-جابدىقتارمەن جابدىقتالعان.
«تۇركىستان وبلىسى پد كريمينالدىق پوليسيا باسقارماسى مەن جىلدام قيمىلدايتىن ارنايى جاساق قىزمەتكەرلەرى بىرلەسىپ، تۇركىستان وبلىسىنىڭ 7 تۇرعىنىنان تۇراتىن الدىن الا ءسوز بايلاسۋ ارقىلى قىلمىس جاساعان ادامدار توبىن ۇستادىق، ولاردىڭ ءبىرى بۇرىن سوتتالعان. كۇدىكتىلەر بالىق اۋلاۋعا قاجەتتى بارلىق قۇرال-جابدىقتارمەن جابدىقتالعان، ياعني قايىقتار، كوستيۋمدەر، ەلەكتر قوندىرعىلارىن قولدانا وتىرىپ، تابيعي رەسۋرستاردى ءوندىرۋدى تابىس كوزىنە اينالدىرعان»، - دەلىنگەن اقپاراتتا.
بەلگىلى بولعانداي، براكونەرلەر تۇنگى ۋاقىتتا شاردارا جانە كوكساراي سۋ قويمالارىندا، تابيعات قورعاۋ ينسپەكتورلارىنىڭ جوق ءساتىن ءبىلىپ، زاڭسىز بالىق اۋلاعان. سودان كەيىن ولار ەكى اۆتوكولىكپەن زاڭسىز اۋلانعان بالىقتاردى شىمكەنت قالاسىنىڭ بازارلارىنا اپارىپ ساتقان. اقشاسىن ءوزارا ءبولىسىپ وتىرعان.
«قازىرگى ۋاقىتتا الدىن الا ءسوز بايلاسىپ قىلمىس جاساعانداردىڭ زاڭسىز بالىق اۋلاۋدىڭ 3 جايتىنا قاتىستىلىعى دالەلدەندى. ال كەلتىرىلگەن شىعىن كولەمى 11،5 ميلليون تەڭگەدەن اسادى. كۇدىكتىلەردىڭ تۇرعىلىقتى جەرىن ءتىنتۋ كەزىندە، 2 اۆتوكولىك، 3 قايىق، 4 قايىق قوزعالتقىشى، 10 قارماق، 6 بالىق اۋلاۋ كوستيۋمى، 2 راديوستانسيا جانە باسقا دا بالىق اۋلاۋ قۇرالدارى، سونداي-اق 120-دان استام بالىق اۋلاۋ تورلارى مەن 1،5 توننادان استام زاڭسىز اۋلانعان بالىق تاركىلەدىك. بۇگىندە 3 كۇدىكتىنى قاماۋعا الدىق، توپتىڭ قالعان مۇشەلەرىنە قاتىستى "ەشقايدا كەتپەۋ تۋرالى قولحات" تۇرىندە بۇلتارتپاۋ شاراسى تاڭدالدى. تەرگەۋدى ق ر قك 335-بابى "بالىق رەسۋرستارىن، باسقا سۋ جانۋارلارىن نەمەسە وسىمدىكتەرىن زاڭسىز ءوندىرۋ" بويىنشا جۇرگىزۋدەمىز. وقيعانىڭ بارلىق ءمان-جايى انىقتالۋدا»، - دەپ تۇيىندەدى پوليسيا پولكوۆنيگى ق.ساحوۆ.