اسا مەيىرىمدى، ەرەكشە راقىمدى اللانىڭ اتىمەن باستايمىن.
بارشا ماداق اتاۋلى الەمدەردىڭ راببىسى اللاعا ءتان. ادامزاتتىڭ اسىلى پايعامبارىمىز مۇحاممەدكە ونىڭ وتباسى مەن ساحابالارىنا سالاۋات پەن سالەم بولعاي!
ءپىتىر ساداقاسى قاجەتتىلىگىن قوسپاعاندا، مال-مۇلكى نيساب مولشەرىنە جەتكەن ءاربىر مۇسىلمانعا بەرۋى – ءۋاجىپ. ول – ورازانىڭ قاتە-كەمشىلىكتەرىن تولتىراتىن، قۇدايعا شۇكىرشىلىك ەتۋ ءۇشىن بەرىلەتىن جانە كەدەيلەردى قۋانتاتىن ساداقا.
يبن وماردان جەتكەن حاديستە بىلاي دەيدى:
«اللانىڭ ەلشىسى رامازان ايىندا ءپىتىر ساداقاسىن ءار ءبىر ازات مۇسىلمانعا، ەر مەن ايەلگە، ۇلكەن مەن كىشىگە ءبىر ساع قۇرما نەمەسە ارپادان بەرۋدى مىندەتتەدى. ءارى ونى ادامدار ايت نامازىنا شىقپاس بۇرىن وتەۋدى ءامىر ەتتى».
يبن ابباستان (ر.ا.) ريۋايات ەتكەن حاديستە:
«اللانىڭ ەلشىسى (وعان اللانىڭ سالاۋاتى مەن سالەمى بولسىن) ءپىتىر ساداقاسىن بەرۋدى رامازان ايىنداعى ورازا كەزىندە جىبەرىلگەن قاتەلىكتەردى تازارتۋ ءۇشىن ءارى مىسكىندەرگە ءبىر توي بولۋ ءۇشىن مىندەت ەتكەن» ، - دەلىنگەن.
تۇرمىسى ناشار، ياعني ارتىق مال-مۇلكى نيساب مولشەرىنە جەتپەگەن كىسى ءپىتىر ساداقا بەرۋگە مىندەتتى ەمەس، ساۋاپ ءۇشىن بەرىپ جاتسا ءوز ەركى. قايتىس بولعان ادامدارعا، انا قۇرساعىنداعى بالاعا ءپىتىر ساداقا بەرىلمەيدى.
ءپىتىر ساداقانىڭ مولشەرى بيداي نەمەسە ۇن جانە مەيىزدەن جارتى ساع (2 كگ)، ال ارپا مەن قۇرمادان ءبىر ساع (4 كگ)، ياكي وسىلاردىڭ اقشالاي قۇنى بەرىلەدى.
2024 جىلعى ءپىتىر ساداقانىڭ باعاسى نارىقتىق ورتاشا باعاسىمەن ەسەپتەلىپ تومەندەگىدەي بەكىتىلدى:
بيداي 2 كگ – 341 تەڭگە.
ۇن 2 كگ – 640 تەڭگە.
ارپا 4 كگ – 701 تەڭگە.
مەيىز 2 كگ – 5745 تەڭگە.
قۇرما 4 كگ – 8536 تەڭگە.
قازىرگى تاڭدا بيدايدىڭ ءوزى ەمەس، ۇن، تالقان سەكىلدى ونىڭ ونىمدەرى كەڭ قولدانىلادى. سول سەبەپتى قازاقستان مۇسىلماندارى ءدىني باسقارماسى ءپىتىر ساداقانىڭ قۇنىن ۇنمەن ەسەپتەۋدى نەگىزگە الادى. ويتكەنى شاريعاتتا بيدايمەن قاتار ونىڭ ونىمدەرىمەن دە ءپىتىر ساداقا بەرۋگە رۇقسات ەتىلەدى.
ءپىتىر ساداقانى بەرۋدىڭ ءۋاجىپ ۋاقىتى ايتتىڭ ءبىرىنشى كۇنى. ونى رامازان ايىنىڭ ءبىرىنشى كۇنىنەن باستاپ بەرۋگە بولادى. ۋاقىتىندا بەرە الماعان جاعدايدا ايت نامازىنان كەيىن بەرسە دە بولادى. الايدا ءپىتىردى ايت نامازىنا دەيىن بەرۋ – مۇستاحاب.
وسىعان وراي 2024 جىلعى رامازان ايىنداعى ءبىر ادام ءۇشىن بەرىلەتىن ءپىتىر ساداقا مولشەرى 2 كەلى ۇننىڭ نارىقتىق ورتاشا باعاسىمەن ەسەپتەلىپ، 640 تەڭگە ەتىپ بەلگىلەندى. دەگەنمەن باي، اۋقاتتى ادامدار ءپىتىر ساداقانى 2 كەلى مەيىزبەن (5745 تەڭگە) نەمەسە 4 كەلى قۇرمامەن (8536 تەڭگە) بەرگەنى جاقسىراق. ال ءپىديا مولشەرى – ءبىر ادامنىڭ كۇندەلىكتى (تاڭعى جانە كەشكى) تويىپ ىشەتىن اسى. ونىڭ بيىلعى مولشەرى 3400 (ءۇش مىڭ ءتورت ءجۇز) تەڭگە بولىپ بەكىتىلدى. بۇعان شاماسى كەلمەگەندەر ورازانىڭ ءار كۇنىنە ءپىتىر ساداقاسىنىڭ قۇنىن بەرەدى.