وتاندىق كينوگەرلەر جىل باسىنان بەرى پيچينگكە قۇجات وتكىزۋ ءتارتىبىن وزگەرتۋ، ساراپتامالىق كەڭەستىڭ قۇرامىن قايتا قاراۋ جانە سەنارلىق كوميسسيا قۇرۋ بويىنشا ماسەلەلەردى كوتەرىپ كەلەدى.
وسىعان بايلانىستى كينوگەرلەردىڭ قاتىسۋىمەن قولدانىستاعى ق ر «كينەماتوگرافيا تۋرالى» زاڭىنىڭ نورماتيۆتىك-قۇقىقتىق اكتىلەرىنە وزگەرىستەر مەن تولىقتىرۋلار ەنگىزۋ بويىنشا جۇمىس توبى قۇرىلعان بولاتىن، دەپ حابارلايدى اlmaty-akshamy.kz.
ۇلتتىق كينونى قولداۋ مەملەكەتتىك ورتالىعىندا جۇمىس توپتارىنىڭ كەزەكتى وتىرىسى ءوتتى. جيىنعا كينوگەرلەردەن بولەك، مادەنيەت جانە اقپارات مينيسترلىگىنىڭ مادەنيەت كوميتەتىنىڭ ءتورايىمى كۇمىس سەيىتوۆا، ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك جۇماعالي قاتىستى. ماماندار مىناداي وزگەرىستەر ەنگىزۋدى ۇسىندى:
- ساراپتاما كەڭەسى اۋەلى ەڭ ۇزدىك جانە قىزىقتى دەگەن سەنارييلەردى تاڭدايدى. سودان كەيىن تاڭدالعان كينوجوبالاردىڭ ءتيىستى قۇجاتتارى جينالىپ، پيچينگكە قاتىسۋعا جىبەرىلەدى (قۇجاتتاردى تاپسىرعاننان كەيىن انىقتالعان قاتەلەردى تۇزەۋگە 3 كۇن بەرىلەدى)؛
- پيچينگكە كومپانيالار ءار كاتەگوريا بويىنشا (كوركەم، دەرەكتى جانە انيماسيالىق فيلمدەر) تەك 2 جوبا وتكىزە الادى؛
- مەملەكەت قارجىسىن الۋعا ۇمىتكەر كينوجوبالاردى قابىلدايتىن ساراپتاما كەڭەسى 15 ماماننان تۇرۋى كەرەك. ءار كاتەگوريانىڭ (كوركەم، دەرەكتى جانە انيماسيالىق فيلمدەر) ءوز ساراپتاما كەڭەسى (5 مۇشەدەن) بولادى. ءبىراق قورىتىندى شەشىمدى بىرىگىپ شىعارادى؛
- ساراپتاما كەڭەسىنىڭ قۇرامىندا كينوتانۋشى، كينوسىنشى، كينوپروكات سالاسىنىڭ وكىلدەرى جانە مىندەتتى تۇردە كينووندىرىسىنە قاتىسى بار ماماندار بولۋى شارت؛
- كەڭەس مۇشەلەرىنىڭ قارجىلاندىرۋعا ۇسىنعان كينوجوبادا جۇمىس ىستەۋىنە نەمەسە اقىلى قىزمەت كورسەتۋىنە قۇقىعى جوق؛
- پيچينگ اياقتالعاننان كەيىن ساراپتامالىق كەڭەستىڭ قورىتىندىسى مەن ۆەدومستۆوارالىق كوميسسيانىڭ ۇسىنىم ناتيجەلەرى كينوورتالىقتىڭ ينتەرنەت-رەسۋرسىندا بىردەن جاريالانادى.
بۇل ەنگىلىزۋى مۇمكىن وزگەرىستەردىڭ تەك ءبىر بولىگى عانا. كينوورتالىقتىڭ باسقارما ءتوراعاسى قۇرمانبەك جۇماعاليدىڭ ايتۋىنشا، بۇعان دەيىن جۇمىس توبىنىڭ مۇشەلەرىمەن بىرنەشە وتىرىس ءوتتى. كينوگەرلەردەن ءالى دە كوپتەگەن ۇسىنىس ءتۇسىپ جاتىر. الداعى كۇندەرى ونىڭ بارلىعى ءجىتى قارالىپ، قۇجات جوباسىنا ەنگىزىلمەك.
«ماقساتىمىز – وتاندىق كينويندۋستريانى دامىتاتىن، سالا ماماندارىنىڭ شىعارماشىلىعىنا ەش كەدەرگى كەلتىرمەيتىن، قازىرگى زامانعا لايىقتالعان «ورتاق ەرەجە» قابىلداۋ. ەڭ باستىسى، ءبىز بۇل جۇمىستاردى كينو سالاسى ماماندارىنىڭ وزدەرىمەن بىرىگىپ، اقىلداسىپ اتقارىپ جاتىرمىز. «كەلىسىپ پىشكەن تون كەلتە بولمايدى» دەگەن ۇمىتتەمىز»، - دەدى قۇرمانبەك جۇماعالي.
ق ر «كينەماتوگرافيا تۋرالى» زاڭىنىڭ نورماتيۆتىك-قۇقىقتىق اكتىلەرىنە وزگەرىستەر مەن تولىقتىرۋلار ەنگىزۋ باعىتىنداعى جۇمىس توپتارىنىڭ وتىرىستارى الداعى ۋاقىتتا دا وتەتىن بولادى. قورىتىندى ۇسىنىستار جيناقتالعاننان كەيىن مادەنيەت جانە اقپارات مينيسترلىگىنە جولدانادى.