ىزدەۋ جۇمىستارى 2 تاۋلىكتەن استام ۋاقىت جۇرگىزىلدى
پەتروپاۆلدا جىلۋ-ەلەكتر ورتالىعىنداعى اپات كەزىندە ءۇيىندى استىندا قالعان ماشينيست-قاراۋشىنىڭ دەنەسى تابىلدى، دەپ حابارلايدى Almaty-akshamy.
سولتۇستىك قازاقستان وبلىسى دەنساۋلىق ساقتاۋ باسقارماسىنىڭ باسپا ءسوز قىزمەتى جىلۋ-ەلەكتر ورتالىعىندا ءتۇتىن مۇرجاسى وپىرىلىپ تۇسكەن كەزدە ءۇيىندى استىندا قالعان ماشينيست-قاراۋشىنىڭ دەنەسى تابىلعانىن راستادى.
الەۋمەتتىك جەلىدە ايەلدىڭ دەنەسى تابىلعانى جونىندە اقپارات شامامەن ەكى ساعات بۇرىن تارادى.
سقو توتەنشە جاعدايلار دەپارتامەنتىنىڭ مالىمەتىنشە، كەزەكشى اۋىسىم قىزمەتكەرلەرىنىڭ بار-جوعىن انىقتاۋ كەزىندە قازاندىق سەحىنىڭ جابدىقتارىن قاراۋشى ماشينيست، 1984 جىلى تۋعان ايەلدىڭ جوقتىعى انىقتالعان.
سقو تجد قىزمەتكەرلەرى وقيعا ورنىندا دەرەۋ ىزدەستىرۋ-قۇتقارۋ جۇمىستارىن باستادى. كەيىن ولارعا نۇر-سۇلتان قالاسىنىڭ جەدەل-قۇتقارۋ جاساعىنىڭ قۇتقارۋشىلارى قوسىلدى.
ىزدەۋ جۇمىستارى 2 تاۋلىكتەن استام ۋاقىت جۇرگىزىلدى. بۇل جۇمىسقا كينولوگيالىق قىزمەت تە تارتىلدى. اۋىر ينجەنەرلىك تەحنيكانى پايدالانۋ مۇمكىندىگى بولماعاندىقتان قۇتقارۋشىلار ۇيىندىلەردى قولمەن شانس جانە گيدراۆليكالىق قۇرالداردى پايدالانا وتىرىپ قوپاردى.
22 ناۋرىز كۇنى ساعات 10.32-دە قۇرىلىس كونسترۋكسيالارىنىڭ ۇيىندىلەرىنىڭ استىنان ايەلدىڭ دەنەسى تابىلدى. ساعات 12.05-تە مۇردە ۇيىندىلەردىڭ استىنان شىعارىلدى جانە سوت-مەديسينالىق ساراپتاما جۇرگىزۋ ءۇشىن بەرىلدى.
سقو تجد پسيحولوگيالىق قىزمەت توبى مارقۇمنىڭ تۋىستارىمەن جۇمىس ىستەپ جاتىر.
جۇمىسشىنىڭ ءاتى-جونى - ناتاليا ولەگوۆنا چەفونوۆا.
ەستەرىڭىزگە سالايىق، 20 ناۋرىز كۇنى ساعات 19.20 مينۋت كەتكەندە پەتروپاۆلداعى جىلۋ-ەلەۋتر ورتالىعىنىڭ ءبىر مۇرجاسى قۇلادى.
ورتالىقتاعى اپاتقا بايلانىستا قىلمىستىق ءىس قوزعالدى.
جەو-داعى ءتۇتىن مۇرجاسىنىڭ جارتىلاي قۇلاۋىنا بايلانىستى وبلىس اكىمى جەدەل شتاب قۇردى.
وسى وقيعا بويىنشا پرەزيدەنت وبلىس ورتالىعى مەن باسقا دا ەلدى مەكەندەردىڭ تۇرعىندارىن تەز ارادا جىلۋمەن قامتاماسىز ەتۋدى تاپسىردى.
21 ناۋرىز كۇنى اپات بولعان جىلۋ ورتالىعىنىڭ ديرەكتورى مەن باس ينجەنەر ۋاقىتشا ۇستاۋ يزولياتورىنا قامالدى.