مامانداردىڭ ايتۋىنشا، بۇلار - كورشى ەلدەن كەلگەن ءسىبىر ەلىكتەرى.
پەتروپاۆلدا جابايى ەلىكتەر قاپتاپ ءجۇر. سوڭعى كۇندەرى قالا كوشەلەرىندە ولاردى ءجيى بايقاۋعا بولادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
الەۋمەتتىك جەلىگە جۇكتەلگەن بەينەكادرلاردان ەن دالا ەركەلەرىنىڭ قالا كوشەلەرىندە ەمىن-ەركىن جۇرگەنىن بايقاۋعا بولادى. كوزبەن كورىپ، ۇيالى تەلەفوندارىنا ءتۇسىرىپ، قىزىقتاپ جاتقان تۇرعىندار ولاردى شاھار سىرتىنداعى اينالما جول مەن ورتالىق كوشەلەردە ءجيى كەزدەستىرەتىن كورىنەدى.
«ايالدامادا تۇرعان ۋاقىتتا جۇگىرىپ كەلە جاتقان ەلىكتى كوردىم. قولىمدا ۇيالى تەلەفون بولىپ، ءتۇسىرىپ الدىم. شىنىمدى ايتسام، قالا ورتاسىندا جۇرگەن جابايى جانۋاردى العاش رەت كورۋىم»، – دەدى قالا تۇرعىنى يليا پفايفەر.
وبلىس ورتالىعىنىڭ بىرنەشە جەرىنەن تۇرعىنداردىڭ نازارىنا ىلىككەن جابايى ەلىكتەر ادامداردان دا، تەحنيكادان دا شوشىپ، ۇركىمەيتىن كورىنەدى.
«قۇربىمىز ەكەۋمىز كەشكىسىن ورتالىق كوشەدە كەتىپ بارا جاتىپ ەلىكتى كوردىك. جولدى كەسىپ ءوتتى. كولىكتەردەن دە، ادامداردان دا قورىققان جوق. مۇنى كورىپ تاڭقالدىق»، – دەدى قالا تۇرعىنى ۆيكتوريا ستاركوۆا.
مامانداردىڭ ايتۋىنشا، بۇلار - كورشى ەلدەن كەلگەن ءسىبىر ەلىكتەرى. بىلتىر ول جاقتا قار قالىڭ ءتۇسىپ، اياز كۇشەيگەن. سوندىقتان ازىق تاپپاي، قازاقستانعا كوشىپ كەلگەن.
«رەسەيدىڭ كەي وبلىسىندا قاراشا ايىنىڭ باسىندا اۋا رايى بۇزىلىپ، قار جاۋىپ، اياز بولدى. ەلىكتەرگە سول كەزدە ازىق تابۋ قيىنعا سوققان كورىنەدى. ال ءبىزدىڭ وبلىستا اۋا رايى قولايلى. قاراپ وتىرساڭىز، جابايى جانۋارلار ادامداردان اسا قاتتى ۇرىكپەيدى. ەلىكتەردىڭ ءبىزدىڭ جاقتان ەمەس ەكەنىن بىردەن بايقاۋعا بولادى»، – دەدى سقو ورمان شارۋاشىلىعى جانە جانۋارلار دۇنيەسى ينسپەكسياسى ءبولىمىنىڭ باسشىسى ولەگ بەسپالوۆ.
بۇعان دەيىن جانۋارلار مامليۋت، قىزىلجار جانە ماعجان جۇمابايەۆ اۋدانىندا ءجيى كوزگە تۇسكەن. ماماندار تۇرعىنداردى ەلىكتەردى قورقىتپاۋعا شاقىرادى. ال قالا ىشىندە نەمەسە الىس جولعا شىققاندارعا جولدا قىراعى بولۋعا كەڭەس بەرەدى.