تجم ازاماتتارعا ءورت قاۋىپسىزدىك ەرەجەلەرىن ساقتاۋعا كەڭەس بەرەدى
2022 جىلى 13 ناۋرىزدا ساعات 01:07 سقو تج دەپارتامەنتىنىڭ «ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى» مم 101 تەلەفونىنا ماسكەۋ وتكەلىندەگى 4 پاتەرلى كىرپىش تۇرعىن ۇيدە (بەرەكە شاعىن اۋدانى) ءورت شىققانى تۋرالى حابارلاما كەلىپ ءتۇستى. بۇل تۋرالى ق ر تجم باسپا ءسوز قىزمەتى مالىمدەدى، دەپ حابارلايدى Almaty-akshamy.kz.
ءورت سوندىرۋشىلەر ساعات 01:13-تە كەلگەن ساتتە ۇيدەگى № 3 پاتەر جانىپ جاتقانى انىقتالدى. ءۇيدىڭ شاتىرى ورتكە ورانعان، قويۋ ءتۇتىن باسقان. ءورتتىڭ شىعۋى تۋرالى حابارلاما قۇزىرلى ورگانعا كەش بەرىلگەن.
ءورت سوندىرۋشىلەر دەرەۋ ءورتتى سوندىرۋگە كىرىسكەن. ءورتتى ءسوندىرۋ بارىسىندا 1975، 1979، 1960 جىلدارى تۋعان ەكى ەر ادامنىڭ جانە 1960، 1967 جىلدارى تۋعان 2 ايەل ادامنىڭ دەنەلەرى تابىلدى. قايتىس بولعان ادامداردىڭ دەنەلەرى سوت-مەديسينالىق ساراپتاماعا جىبەرىلدى. ءۇي ورتالىق جىلىتۋ جۇيەسىنە قوسىلعان. ءورت ساعات 01.53-تە اۋىزدىقتالىپ، ساعات 02.24-تە ءسوندىرىلدى.
ءورت ءسوندىرۋ كەزىندە پەتروپاۆل قالاسى 4 ءورت ءسوندىرۋ ءبولىمىنىڭ (№1، 2، 3 جانە 5) 30 ءورت ءسوندىرۋشىسى مەن 6 بىرلىك تەحنيكاسى جۇمىلدىرىلدى. ءورت اۋماعى 60 شارشى مەتردى قۇرادى.
ءورتتىڭ شىعۋىنا الكوگولدىك ىشىمدىك ءىشىپ، توسەكتە تەمەكى تارتۋ سەبەپ بولۋى مۇمكىن دەگەن بولجام بار. كەلتىرىلگەن شىعىن مولشەرى انىقتالۋدا. 2022 جىلعى 1 اقپاندا №5 ءورت ءسوندىرۋ ءبولىمىنىڭ قىزمەتكەرلەرى اۋلا ارالاۋ جۇمىستارى بارىسىندا ورتتە قايتىس بولعان ەر ادامداردىڭ ءبىرى، 1960 جىلى تۋعان ەر ادامعا ءورت قاۋىپسىزدىك ەرەجەلەرى جازىلعان جادىناما تابىس ەتكەن بولاتىن. قازا تاپقاندار حالىقتىڭ الەۋمەتتىك وسال توپتارى ساناتىنا جاتپايدى، سپيرتتىك ىشىمدىك ىشەتىن ادامدار رەتىندە ەسەپكە الىنباعان. كۋاگەرلەردىڭ ايتۋىنشا، ءورت شىعار الدىندا قايتىس بولعاندار سپيرتتىك ىشىمدىك ىشكەن. بيىلعى جىلى سقو اۋماعىندا 115 ءورت بولدى، وندا 12 ادام قازا تاپتى، 4 ادام زارداپ شەكتى، كەلتىرىلگەن ماتەريالدىق شىعىن شامامەن 72 ملن تەڭگەنى قۇرادى.
تجم ازاماتتارعا ءورت قاۋىپسىزدىك ەرەجەلەرىن ساقتاۋعا كەڭەس بەرەدى.