كۇزگى-قىسقى كەزەڭنىڭ باستالۋىمەن تۇرعىندارعا ەلەكتر جىلىتقىشتاردى، پەشتەر مەن گاز جابدىقتارىن پايدالانۋ كەزىندەگى قاۋىپسىزدىك ەرەجەلەرى ەسكە سالىنۋدا. ورتتەردىڭ كوبى وسى جابدىقتاردى پايدالانۋ ەرەجەلەرىن بۇزۋ سالدارىنان ورىن الادى، دەپ حابارلايدى aqshamnews.kz
شىمكەنت قالاسى تجد قىزمەتكەرلەرى پەشتەردى، ەلەكتر جىلىتقىشتاردى، ەلەكتر جانە گاز جابدىقتارىن ءقاۋىپسىز پايدالانۋ ەرەجەلەرىن تۇسىندىرۋگە ەرەكشە نازار اۋدارۋدا. ءىس-شارا «قازترانسگازايماق» اق فيليالىنىڭ قىزمەتكەرلەرى مەن جاستار رەسۋرستىق ورتالىعىنىڭ ەرىكتىلەرىمەن بىرلەسە ۇيىمداستىرىلدى.
ءىس-شارا بارىسىندا الەۋمەتتىك وسال توپتارداعى، مۇمكىندىگى شەكتەۋلى ازاماتتار مەن ارداگەرلەرگە تۇرمىستاعى ءورت قاۋىپسىزدىگى، پەشتەر مەن گازدى جىلىتۋ قۇرالدارىن قولدانۋ ەرەجەلەرى ءتۇسىندىرىلدى. تجد ماماندارى ەلەكتر اسپاپتارى مەن گاز جابدىقتارىن ءقاۋىپسىز پايدالانۋ ءتارتىبىن ەرەكشە اتاپ ءوتتى، ال گاز قىزمەتى وكىلدەرى گاز سيگناليزاتورلارىن ورناتۋ جانە پايدالانۋ تۋرالى تولىق اقپارات بەردى.
ءورت قاۋىپسىزدىگى مادەنيەتىن ارتتىرۋ ماقساتىندا سۇراق-جاۋاپ تۇرىندە ءتۇسىندىرۋ جۇمىستارى جۇرگىزىلدى. ماماندار ۋلى گازبەن ۋلانۋ كەزىندە العاشقى كومەك كورسەتۋ، ەلەكتر جىلىتقىشتاردى ورناتۋ جانە پايدالانۋ تالاپتارى بويىنشا تۇرعىنداردىڭ سۇراقتارىنا جاۋاپ بەردى. ولار شۇعىل قىزمەتتەردىڭ بايلانىس نومىرلەرىن ەسكە سالىپ، ءورت قاۋىپسىزدىگى تۋرالى جادىنامالار تاراتىپ، مۇرجانى جىلىتۋ ماۋسىمىندا قالاي تازالاۋ كەرەكتىگىن كورسەتتى.
جىلىتۋ ماۋسىمى باستالعالى قاتتى وتىنمەن پايدالانىلاتىن 3500-دەن استام تۇرعىن ءۇي، سونىڭ ىشىندە 83 مۇمكىندىگى شەكتەۋلى ازاماتتار مەن ارداگەرلەردىڭ ۇيلەرى تەكسەرىلدى. بۇل ۇيلەردە كەزەڭ-كەزەڭمەن كومىرتەگى توتىعىن انىقتايتىن سيگناليزاتورلار ورناتىلۋدا. بۇگىنگى كۇنگە دەيىن 98 ۋلى گازدى انىقتايتىن سيگناليزاتور ورناتىلىپ، 193 پەشتىڭ مۇرجاسى ارنايى تاسىلمەن تازالاندى.
«بۇل شارالار تۇرعىندار اراسىندا ءورت قاۋىپسىزدىگىن ناسيحاتتاپ، ءورت جاعدايىندا دۇرىس ارەكەت ەتۋ مادەنيەتىن قالىپتاستىرۋعا باعىتتالعان»، - دەپ ءتۇسىندىردى تجد باستىعىنىڭ ورىنباسارى ەركىن وتارعالىم ۇلى.