ءبىلىم سالاسىنداعى رەفورمالار
ۇكىمەت وتىرىسىندا ءبىلىم سالاسىندا ەنگىزىلەتىن وزگەرىستەر جايلى ايتىلدى، دەپ حابارلايدى Almaty-akshamy.kz
«بولاشاق پەداگوگتەردى دايىنداۋ ساپاسىن ارتتىرۋ ءۇشىن، سالالىق بىلىكتىلىك شەڭبەرىن جانە «پەداگوگ» كاسىبي ستاندارتىن بۇگىنگى زامان تالاپتارىنا ساي وزگەرتەمىز. ءپان مۇعالىمدەرىنىڭ تاپشىلىعى پروبلەمالارىن شەشۋ ءۇشىن قايتا دايارلاۋ تەتىگىن قولدانامىز. مىسالى، ماماندىعى ءمۇعالىم ەمەس، ءبىراق كاسىبي ءبىلىمى مەن تاجىريبەسى جەتكىلىكتى ماماندار مۇعالىمدىككە قايتا دايارلاۋ ارقىلى تارتىلادى»، - دەدى ايماعامبەتوۆ.
مينيستر اتاپ وتكەندەي، مەملەكەت باسشىسىنىڭ تاپسىرماسىمەن بىلىكتىلىكتى ارتتىرۋ كۋرستارى ەندى پەداگوگتەر ءۇشىن 5 جىلدا ءبىر رەت ەمەس، 3 جىلدا ءبىر رەت وتكىزىلەدى. ءتيىستى زاڭ جوباسى پارلامەنتتە قاراستىرىلىپ جاتىر. پەداگوگتەردىڭ كۋرستارىنىڭ مازمۇنى دا ايتارلىقتاي وزگەرەدى.
«پەداگوگتەردى جۇمىسقا قابىلداۋ، اتتەستاتتاۋ پروسەستەرىن اۆتوماتتاندىرۋ جوسپارلانۋدا، EduKyzmet ءبىرىڭعاي اقپاراتتىق جۇيەسىندە ءمۇعالىمنىڭ جەكە كابينەتى، پورتفوليوسى اشىق تۇردە جينالادى. بۇل جۇيە سىبايلاس جەمقورلىق تاۋەكەلدەرىن جويۋ ءۇشىن وتە ماڭىزدى. سونداي-اق باسشىلاردىڭ كاسىبي الەۋەتى مەن باسقارۋشىلىق تاجىريبەسىن ءتيىمدى پايدالانۋ ءۇشىن ديرەكتورلاردى روتاسيالاۋ ءراسىمى بيىلعى جىلدان باستاپ تولىعىمەن جۇزەگە اسىرىلادى»، - دەدى مينيستر.