2 قازاندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باسقارما توراعاسى-رەكتور بولات تىلەپ الماتى قالاسى ءبىلىم باسقارماسىنىڭ جالپى ءبىلىم بەرەتىن مەكتەپتەرىنىڭ ديرەكتورلارىمەن كەزدەستى.
كەزدەسۋگە ۋنيۆەرسيتەتتىڭ اكادەميالىق ماسەلەلەر جونىندەگى دەپارتامەنتى مەن پەداگوگيكا كافەدراسىنىڭ مەڭگەرۋشىسى ش. كولۋمبايەۆا، الماتى قالاسى ءبىلىم باسقارماسىنىڭ مەكتەپتەرىنىڭ باسشىلارى مەن پەداگوگيكا سىنىپتارىندا ساباق بەرەتىن پروفەسسور-وقىتۋشىلار قۇرامى قاتىستى، دەپ حابارلايدى Almaty-akshamy.kz.
«كەزدەسۋدە ۋنيۆەرسيتەتىمىزدىڭ ءباسقارما-توراعاسى مەكتەپ ديرەكتورلارىن كاسىبي مەرەكە – مۇعالىمدەر كۇنىمەن قۇتتىقتاپ، بۇگىندە ەلىمىزدىڭ جوعارى بىلىكتى پەداگوگتارعا دەگەن سۇرانىسىنىڭ جوعارى ەكەنىن اتاپ ءوتتى. مىنە، وسى تۇرعىدان كەلگەندە ورتا مەكتەپ پەن اباي ۋنيۆەرسيتەتىنىڭ بىرلەسە جۇرگىزىپ وتىرعان بۇل جوباسى وتە وزەكتى دەپ سانايمىن. وسى جوبانىڭ جۇزەگە اسۋىنا مۇرىندىق بولىپ، ۋنيۆەرسيتەتىمىزبەن ارىپتەستىك ورناتقاندارىڭىز ءۇشىن سىزدەرگە العىس بىلدىرەمىن»، – دەدى رەكتور بولات تىلەپ.
بۇل باستامانى ءبىز بىلتىرعى وقۋ جىلىندا ۇلكەن پيلوتتىق جوبا رەتىندە قولعا العان ەدىك. ونداعى ماقسات الماتى قالاسىنىڭ ءبىلىم باسقارماسىمەن بىرلەسە وتىرىپ قالانىڭ ەكى مەكتەبىنەن پەداگوگيكالىق ماماندىقتارعا يكەمى بار جوعارى سىنىپ وقۋشىلارىن ۇستازدىققا بەيىمدەۋ بولاتىن. ناتيجەسىندە اباي ۋنيۆەرسيتەتى اتالعان مەكتەپتەردە ورتالىقتار اشىپ، بىلىكتى پروفەسسور-وقىتۋشىلارىمىزدىڭ كومەگىمەن مەكتەپ وقۋشىلارىنا جىل بويى ءبىلىم بەرىپ، جەكەلەگەن پاندەردەن تاپسىرمالار دايىنداپ، ۇنەمى باقىلاپ وتىردى. بۇل دا ەرتەڭگى ۇرپاق قامى ءۇشىن اباي ۋنيۆەرسيتەتىنىڭ قولعا الىپ وتىرعان يگى باستاماسى ەدى. اتالعان باستاما مەملەكەت باسشىسىنىڭ قازاقستان رەسپۋبليكاسىندا ءبىلىمدى دامىتۋدىڭ 2022-2026 جىلدارعا ارنالعان تۇجىرىمداماسى نەگىزىندە ىسكە اسىرىلعان بولاتىن.
سونداي-اق باسقوسۋدا پەداگوگيكا كافەدراسىنىڭ مەڭگەرۋشىسى شولپان كولۋمبايەۆا پەداگوگيكالىق سىنىپ وقىتۋشىلارىن تانىستىرىپ، قولعا الىنعان جۇمىستار بويىنشا قويىلعان سۇراقتارعا جاۋاپ بەردى.
كەزدەسۋدە مەكتەپ ديرەكتورلارى ۋنيۆەرسيتەت تاراپىنان قولعا الىنعان جوباعا قاتىسۋعا ۇلكەن قىزىعۋشىلىق تانىتتى. وسكەلەڭ ۇرپاقتى «ۇستاز» بولۋعا بەيىمدەيتىن بۇل جوبانىڭ مەكتەپ وقۋشىلارى ءۇشىن بەرەرى مول. بۇل سالادا سىزدەردىڭ بىلىكتى ماماندارىڭىزبەن تاجىريبە الماسۋ بىزگە ۇلكەن مۇمكىندىكتەر بەرەدى، – دەپ كەلگەن قوناقتار ۋنيۆەرسيتەت رەكتورىنا العىستارىن ءبىلدىردى.
كەزدەسۋ سوڭىندا اباي اتىنداعى قازۇپۋ مەن الماتى قالاسىنىڭ 13 مەكتەبى اراسىندا «پەداگوگيكالىق سىنىپتار» جوباسىن ىسكە اسىرۋ بويىنشا ىنتىماقتاستىق تۋرالى مەموراندۋمعا قول قويىلدى.