اپ-162/3 مەكەمەسىندە 2022 جىلدىڭ ءبىرىنشى كۇنى جازاسىن وتەۋشىلەر اراسىندا «ەڭ كرەاتيۆتى مۇز ءمۇسىنشىسى» كونكۋرسى ءوتتى، دەپ حابارلايدى almaty-akshamy.kz رavlodarnews.kz سىلتەمە جاساپ.
پاۆلودار وبلىسى بويىنشا قاجد باسپا ءسوز قىزمەتىنىڭ مالىمەتىنشە، توعىز جاساقتىڭ جازاسىن وتەۋشىلەرى قار مەن مۇزدان 14 ءمۇسىن جاساعان. اۋەسقوي شەبەرلەر قاردان جولبارىستار، ارىستاندار، دينوزاۆرلار جانە باسقا دا تۋىندىلاردى جاسادى. ونىڭ ىشىندە بيىلعى جىلدىڭ سيمۆولى ۇزىندىعى جەتى مەترلىك جولبارىس ەرەكشە كوزگە تۇسەدى. ءبىرىنشى جاساق باستىعى ادىلەت مايورى ارمان ءجۇسىپوۆتىڭ ايتۋىنشا، سوتتالعاندار بايقاۋعا قىستىڭ العاشقى كۇندەرىنەن باستاپ دايىندالا باستاعان.
«سوتتالعاندار جاساقپەن بىرلەسىپ، قانداي شىعارماشىلىق يدەيالاردى ىسكە اسىراتىنىن، مۇسىندەردىڭ ورنالاسۋىن تالقىلادى. شىعارماشىلىق جۇمىستى باستاۋ ءۇشىن ايازدىڭ بولۋىن كۇتتى. بيىل قىستىڭ باسى جىلى بولدى، قار دا كوپ تۇسپەدى، ءبىراق سوعان قاراماستان جاڭا جىلدىڭ العاشقى كۇنىندە بايقاۋ ءوتتى. مۇز بەن قاردى قولدانىپ، ءوز ونەرىن كورسەتۋ اركىمنىڭ قولىنان كەلە بەرمەيدى. مۇندا قيال، ونەردەگى داعدىلار، شىعارماشىلىق قاجەت. بايقاۋ بارىسىندا جاساقتار اراسىندا باسەكەلەستىك بايقالدى»، - دەيدى ارمان ءجۇسىپوۆ.
بايقاۋ قورىتىندىسى بويىنشا ءبىرىنشى جاساقتىڭ قۇرامىنداعى سوتتالعان «ۇزدىك ءمۇسىنشى» اتاندى. ول ىنتالاندىرۋ رەتىندە تۋىستارىنا كەزەكتەن تىس بەينەقوڭىراۋ ارقىلى حابارلاسۋ مۇمكىندىگىنە يە بولدى.