اباي وبلىسىنداعى ءشۇلبى سۋ قويماسىنان پاۆلودار وبلىسى اۋماعىنداعى ەرتىس وزەنىنىڭ جايىلىمىنا 6،3 ملرد تەكشە مەتردەن استام سۋ جىبەرىلدى. بۇل جۇمىستى سۋ رەسۋرستارى جانە يرريگاسيا مينيسترلىگى تابيعاتتى قورعاۋ ماقساتىندا جۇرگىزىپ جاتىر، دەپ حابارلايدى aqshamnews.kz
ەرتىس وزەنىنىڭ جايىلمالى اۋماعىنداعى فلورا مەن فاۋنانىڭ تىرشىلىك ەتۋ ورتاسىن جانە تابيعي ونىمدىلىگىن ساقتاۋ ءۇشىن جىل سايىن سۋ جىبەرىلىپ تۇرادى. بۇگىنگى تاڭدا وزەننىڭ ورتا اعىسىنداعى بالىقتاردىڭ ۋىلدىرىق شاشاتىن تابيعي ايماقتارى سۋ استىندا قالدى. سونداي-اق سۋ جىبەرۋ ەرتىس وزەنىنىڭ ارناسىن تازالاۋعا دا باعىتتالعان.
ءقازىر پاۆلودار وبلىسىنداعى گيدروبەكەتتەردە سۋ دەڭگەيىنىڭ كوتەرىلگەنى جانە ەرتىس وزەنىنىڭ جايىلىمدى اۋماقتارىن سۋ باسقانى بايقالىپ وتىر. سونداي-اق پاۆلودار وبلىسىندا شىدەرتى وزەنىنىڭ جايىلىمىنا دا تابيعاتتى قورعاۋ ماقساتىندا سۋ جىبەرىلىپ جاتىر. بۇگىنگى تاڭدا ك. ساتبايەۆ اتىنداعى كانالدان 60 ملن تەكشە مەتردەن استام سۋ باعىتتالدى.
ەكىباستۇز قالاسى مەن اقتوعاي اۋدانىنىڭ اۋىلدىق اۋماعىنداعى فلورا مەن فاۋنانى ساقتاۋعا، سونداي-اق اۋليەكول كولدەر جۇيەسى، باسەنتين جانە شىعاناق كولدەرىن تولتىرۋعا جالپى كولەمى 120 ملن تەكشە مەتر سۋ باعىتتاۋ جوسپارلانىپ وتىر.
بۇگىندە ەكىباستۇز قالاسىنىڭ اۋىلدىق ايماعىنداعى 9 مىڭ گەكتاردان استام كولتاباندار سۋعا تولدى. جالپى العاندا 21 مىڭ گەكتاردان استام القاپقا سۋ جىبەرۋ جوسپارلانعان. تابيعاتتى قورعاۋ جۇمىستارى باستالعاننان بەرى شىعاناق كولىنە 10 ملن تەكشە مەتر سۋ كەلدى.
«تابيعاتتى قورعاۋ ماقساتىندا جىبەرىلەتىن سۋ تەك قورشاعان ورتانى جانە ءوڭىردىڭ تابيعي بايلىعىن ساقتاۋعا كومەكتەسىپ قانا قويمايدى. بۇل اۋىل شارۋاشىلىعىنىڭ، مال شارۋاشىلىعىنىڭ جانە جالپى پاۆلودار وبلىسى ەكونوميكاسىنىڭ دامۋىنا ىقپال ەتەدى. ال بۇل جەرگىلىكتى حالىقتىڭ تۇرمىسىنا وڭ اسەرىن تيگىزەدى»،
- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.