«پاترۋل» سەريالىنىڭ كەيىپكەرلەرى جارالى پوليسيا قىزمەتكەرلەرىنە باردى

كەشە ءتارتىپ ساقشىلارىنىڭ بىرىنە كۇردەلى وتا جاسالعان

«پاترۋل» سەريالىنىڭ كەيىپكەرلەرى بۇلىك كەزىندە جارالانعان پوليسيا قىزمەتكەرلەرىنىڭ جاعدايىن بىلۋگە باردى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

بەلگىلى بولعانداي، كەشە ءتارتىپ ساقشىلارىنىڭ بىرىنە كۇردەلى وتا جاسالعان.  
قىلمىسكەرلەر جۇك كولىگىمەن ونىڭ ەكى اياعىن قاساقانا باسىپ وتكەن.

«ىشكى ىستەر مينيسترلىگى باسشىلىعىنىڭ، الماتى قالالىق پد باسشىلىعىنىڭ، جەكە قۇرامىنىڭ اتىنان، بارشا قازاقستاندىقتاردىڭ اتىنان ءبىز بۇگىن جاپپاي تارتىپسىزدىكتى اۋىزدىقتاۋ كەزىندە زارداپ شەككەن ارىپتەستەرىمىزگە بارىپ، ولاردىڭ دەنساۋلىقتارىن بىلدىك. ءبىز ولاردىڭ تەز ساۋىعىپ كەتۋىن جانە ازاماتتاردىڭ قاۋىپسىزدىگى مەن ەلدەگى تۇراقتىلىق ءۇشىن جاقىن ارادا قىزمەتكە كىرىسۋلەرىنە تىلەكتەسپىز»، – دەدى الماتى قالالىق پد باستىعىنىڭ ورىنباسارى ايدىن قابدۋلدينوۆ.

«جاعداي وتە قيىن. ازاماتتارعا، ولاردىڭ قاۋىپسىزدىگىنە ناقتى ءقاۋىپ ءتوندى. پوليسيا قىزمەتكەرلەرى مەن اسكەري قىزمەتكەرلەرگە ءوز ءومىرى مەن دەنساۋلىقتارىن قاۋىپكە تىگە وتىرىپ، وسى قىلمىستىق ارەكەتتەردى توقتاتقانى ءۇشىن العىس ايتامىز. ءبىز دە بەي-جاي قارامايمىز، قالانى قورعاعانى ءۇشىن پوليسيا قىزمەتكەرلەرىنە قولداۋ بىلدىرەمىز»، – دەدى اكتەرلەر مەدەت امانبايەۆ پەن مەيىرحان شەرنيازوۆ. 

سونىمەن قاتار، ۆاينەرلەر قىلمىسكەرلەردىڭ شابۋىلىنان زارداپ شەككەن ءوز جازىلۋشىلارىنىڭ بىرىنە كىرىپ شىقتى. ابىروي بولعاندا، ءقازىر قىزدىڭ ومىرىنە ءقاۋىپ ءتونىپ تۇرعان جوق، ونىڭ جاعدايى تۇزەلدى.