الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە «ۇلتتىق تۇتىنۋشىلار ليگاسى» رەسپۋبليكالىق قوعامدىق بىرلەستىگىنىڭ پرەزيدەنتى سۆەتلانا رومانوۆسكايا پاتەردى جوندەۋ قىزمەتىن ۇسىناتىن الاياقتاردان قالاي اۋلاق بولۋ كەرەكتىگى تۋرالى ايتتى، دەپ حابارلايدى Almaty-akshamy.kz.
ساراپشى الاياقتاردىڭ ايلا-امالدارىنان قورعانۋ جانە پاتەردى جوندەۋگە ەكى رەت شىعىندالماس ءۇشىن نە ىستەۋ قاجەتتىگىن ايتتى. ول ءۇشىن ەڭ الدىمەن ساراپشى ماماندارمەن كەڭەسىپ، بارلىق شارتتاردى كەلىسىم-شارتتا بەكىتىپ الۋ قاجەتتىگى ايتىلعان.
«كەلىسىم جاساسىپ، وندا ورىندالۋى ءتيىس جۇمىستاردىڭ بارلىق اۋقىمىن ناقتى كورسەتۋ كەرەك. بۇل، ارينە، ليسەنزيالانعان قىزمەت ءتۇرى ەمەس. ەگەر جوندەۋ جۇمىستارىن جۇرگىزەتىن كومپانيا ءوز ماتەريالدارىن ۇسىنسا، وندا سايكەستىك سەرتيفيكاتتارىن تالاپ ەتۋ كەرەك. ياعني، جوندەۋگە پايدالانىلاتىن تاۋاردىڭ كوشىرمەسى كەلىسىم-شارتقا تىركەلۋى كەرەك. تۇتىنۋشىلاردىڭ قۇقىقتارىن قورعاۋ قوعامىنا حابارلاسىپ، كەلىسىم-شارتتىڭ ۇلگىسىن سۇراۋدى ۇسىنامىن. ال ونى تولتىرعاننان كەيىن، وعان قول قويماستان، زاڭگەرمەن كەڭەسىڭىز. وسى جاعدايدا پروبلەمالى ماسەلەلەر الدەقايدا از بولادى. ال ەگەر جوندەۋ جۇمىستارىن جۇرگىزەتىن كومپانيا نەمەسە جەكە تۇلعا بۇل كەلىسىمگە قول قويۋدان باس تارتسا، ونىڭ قىزمەتىنە جۇگىنىپ، اقشا تولەۋدەن اۋلاق بولىڭىز»، - دەپ ءبولىستى ول.
سونداي-اق س. رومانوۆسكايا ۇلتتىق تۇتىنۋشىلار ليگاسىنا جوندەۋ جۇمىستارىنا الدىن-الا 100 پايىز تولەم جاساپ، ال جاسالعان جۇمىستارعا كەلگەندە كوڭىلى تولمايتىن ازاماتتاردىڭ كوپتەپ جۇگىنەتىنىن ايتتى.
«ەگەر جوندەۋ جۇمىستارى ۋاقىتىندا جاسالماسا، تۇتىنۋشىلاردىڭ قۇقىقتارىن قورعاۋ تۋرالى زاڭعا سايكەس جوندەۋشىلەر قابىلداعان مىندەتتەمەلەردى ورىنداۋدى كەشىكتىرگەن ءاربىر كۇن ءۇشىن 1 پايىزىن الۋعا قۇقىعىڭىز بار. سوندىقتان ءسىز تولەگەن سومانىڭ ءبىر پايىزىن ەسەپتەڭىز. ال ەگەر كەلىسىم-شارتتا بەلگىلەنگەن مەرزىم بۇزىلسا، جاڭا ماسەلەلەردىڭ تۋىنداعانىن كۇتپەي، سول كۇنى كەلىسىم-شارتتى بۇزۋعا قۇقىعىڭىز بار»، - دەپ ءبولىستى ساراپشى.