دوڭگەلەك ۇستەلگە قاتىسقان دەپۋتات بيبىگۇل جەكسەنباي وسىلاي دەدى.
قازاقستان رەسپۋبليكاسى پارلامەنتى سەناتىنىڭ دەپۋتاتى بيبىگۇل جەكسەنباي قازاقستان پرەزيدەنتى قاسىم-جومارت توقايەۆتىڭ ساياساتىنىڭ باسىم باعىتتارىنىڭ ءبىرى - بيلىكتىڭ بارلىق تارماقتارى مەن قوعام اراسىنداعى ديالوگتى دامىتۋ، ازاماتتاردىڭ مەملەكەت باسقارۋىنا بارىنشا قاتىسۋىن قامتاماسىز ەتۋ ەكەنىن اتاپ ءوتتى، دەپ حابارلايدى aqshamnews.kz
«پارلامەنت اشىقتىعى تۋرالى دەكلاراسيانىڭ نەگىزگى ۇستانىمدارىنا سايكەس پارلامەنت اشىقتىعىن نىعايتۋ ارقىلى قازاقستان رەسپۋبليكاسى پارلامەنتىنىڭ ءرولى مەن الەۋەتىن ارتتىرۋ» تاقىرىبى بويىنشا وتكەن دوڭگەلەك ۇستەلدى پارلامەنتاريزمدى دامىتۋ قورى جانە ەۋروپاداعى قاۋىپسىزدىك جانە ىنتىماقتاستىق ۇيىمى ۇيىمداستىردى.
«مەملەكەت باسشىسى، ءبىزدىڭ قوعامدى تولعاندىراتىن نەگىزگى پروبلەمالار وركەنيەتتى ازاماتتىق ديالوگ اياسىندا پارلامەنتتە تالقىلانىپ، ءوز شەشىمىن تابۋى ءتيىس ەكەندىگىنە ۇنەمى نازار اۋدارىپ كەلەدى. قازىرگى كەزەڭدە ينكليۋزيۆتىلىكتى ارتتىرۋ، زاڭ شىعارۋشى ورگاندا ءارتۇرلى ساياسي كۇشتەر مەن الەۋمەتتىك توپتاردىڭ وكىلدىگىن كەڭەيتۋ، قوعامعا اشىقتىق جانە ترانسپارەنتتىلىك دەپۋتاتتىق كورپۋس جۇمىسىنداعى ماڭىزدى قاعيداتتار بولىپ تابىلادى. پارلامەنت سەناتىنىڭ جانىنداعى ءار باعىتتاعى كەڭەستەر مەن دەپۋتاتتىق توپتاردىڭ قوعامدىق ۇيىمدار مەن بەلسەندى ازاماتتارمەن بىرلەسە جۇرگىزىلىپ كەلە جاتقان جۇمىستار اۋقىمى كوپ»، - دەپ اتاپ ءوتتى سەناتور بيبىگۇل جەكسەنباي.
دوڭگەلەك ۇستەلگە قاتىسۋشىلار دەرەكتەردىڭ اشىقتىعى مەن ازاماتتاردىڭ قاتىسۋىنىڭ ماڭىزدىلىعىن تالقىلادى. سونداي-اق حالىقارالىق وزىق تاجىريبەلەردى قاراستىردى جانە پارلامەنت اشىقتىعى تۋرالى دەكلاراسيانىڭ قاعيداتتارىن جەرگىلىكتى احۋالعا بەيىمدەۋگە قاتىستى ۇسىنىستار ەنگىزدى. پارلامەنت اشىقتىعىن ودان ءارى نىعايتۋعا نەگىز بولاتىن جول كارتاسىن ازىرلەۋ تاسىلدەرىن كەلىسۋ – نەگىزگى قورىتىندىنىڭ ءبىرى بولدى.
سونىمەن قاتار ازاماتتىق قوعام جانە بۇقارالىق اقپارات قۇرالدارىمەن تۇراقتى ءوزارا ءىس-قيمىل تەتىكتەرى، كوممۋنيكاسيا مەن سەنىم دەڭگەيىن ارتتىرۋعا باعىتتالعان شارالار بەلگىلەندى. بۇل شارا قازاقستاندىقتاردىڭ مۇددەسىنە باعىتتالعان اشىق جانە ايقىن پارلامەنت قالىپتاستىرۋ جولىنداعى ماڭىزدى قادامعا اينالدى. شاراعا قازاقستان رەسپۋبليكاسى پارلامەنتىنىڭ سەناتى مەن ءماجىلىسىنىڭ دەپۋتاتتارى، پارلامەنتاريزم ينستيتۋتىنىڭ باسشىلىعى، ەقىۇ باعدارلامالار كەڭسەسى جانە باسقا دا ۇيىمدار قاتىستى.