پارلامەنتتىك رەفورماعا قاتىستى 350-دەن اسا ۇسىنىس تۇسكەن. بۇل تۋرالى مەملەكەتتىك كەڭەسشى ەرلان قارين مالىمدەدى، - دەپ حابارلايدى aqshamnews.kz ءتىلشىسى.
پارلامەنتتىك رەفورما جونىندەگى جۇمىس توبىنىڭ قازان ايىندا وتكەن العاشقى وتىرىسىندا مەملەكەت باسشىسى كەلىپ تۇسكەن ۇسىنىستاردى جان-جاقتى پىسىقتاپ، پارلامەنتتىك جۇيەنى جاڭعىرتۋ جونىندە ناقتى ۇسىنىمدار ازىرلەۋ قاجەت ەكەنىن اتاپ وتكەن ەدى.
وتىرىستان كەيىن الداعى پارلامەنتتىك رەفورماعا قاتىستى ۇسىنىستار جيناۋ ۇدەرىسى باستالدى. جۇمىس توبىنىڭ مۇشەلەرى، سونداي-اق Amanat، اۋىل، Respublica، اق جول، قحپ، جسدپ ساياسي پارتيالارى وزدەرىنىڭ كوزقاراستارى مەن ۇسىنىمدارىن جولدادى. سونىمەن قاتار E-otinish جانە E-gov پلاتفورمالارى ارقىلى ازاماتتاردان، ساراپشىلاردان، قوعام بەلسەندىلەرىنەن 350-دەن استام ۇسىنىس تۇسكەن.
كەشە پارلامەنتتىك رەفورما جونىندەگى جۇمىس توبىنىڭ كەزەكتى وتىرىسى ءوتىپ، بولاشاق ءبىر پالاتالى پارلامەنت مودەلىن قالىپتاستىرۋعا قاتىستى ماسەلەلەردىڭ ءبىرىنشى بلوگى قارالدى. اتاپ ايتقاندا:
-
ءبىر پالاتالى پارلامەنت قۇرامىنداعى دەپۋتاتتار سانى؛
-
پارلامەنت دەپۋتاتتارىنا قويىلاتىن بىلىكتىلىك تالاپتارى؛
-
دەپۋتاتتاردى سايلاۋ ءتارتىبى؛
-
جاڭا پارلامەنتتىڭ وكىلەتتىلىك مەرزىمى؛
-
پارلامەنتتەگى كۆوتالار (پرەزيدەنتتىك، پارتيالىق ءتىزىم).
ەكى ساعاتتان استام ۋاقىتقا سوزىلعان كونسترۋكتيۆتى تالقىلاۋ بارىسىندا ءتۇرلى ساراپشىلىق ۇستانىمدار مەن پايىمدى پىكىرلەر ورتاعا سالىندى. وتىرىستا ايتىلعان ۇسىنىستاردى قوسىمشا ەگجەي-تەگجەيلى سارالاپ، جۇيەلەۋ تۋرالى شەشىم قابىلداندى.
مەملەكەتتىك كەڭەسشى ەرلان ءقاريننىڭ ايتۋىنشا، جۇمىس توبىنىڭ الداعى وتىرىستارىندا پارلامەنتتىك جۇيەنى جاڭعىرتۋدىڭ باسقا دا باعىتتارى قاراستىرىلاتىن بولادى. رەفورما شەڭبەرىندەگى ۇسىنىستار جيناقتالىپ، ءبىر پالاتالى پارلامەنت مودەلىن قالىپتاستىرۋ بويىنشا كەشەندى قورىتىندى ۇسىنىمدار ازىرلەۋ جوسپارلانىپ وتىر.