بۇگىن ءماجىلىستىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ق ر ۇلتتىق قورىنان بالالارعا ارنالعان قاراجاتتى ەسەپتەۋ، تولەۋ جانە پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ سەنات جاڭا رەداكسيادا ۇسىنعان جەكەلەگەن باپتارىمەن كەلىستى، دەپ حابارلايدى اlmaty-akshamy.kz.
«زاڭ جوباسى 2023 جىلعى 23 مامىردا پارلامەنت ماجىلىسىنە ەنگىزىلدى. قۇجاتتىڭ نەگىزگى ماقساتى - كامەلەتكە تولعان كەزدە جينالعان قاراجات ەسەبىنەن تۇرعىن ءۇي جاعدايلارىن جاقسارتۋعا نەمەسە ءبىلىم الۋعا مۇمكىندىك جاساۋ ماقساتىندا قازاقستان رەسپۋبليكاسى ازاماتتارىنىڭ وسكەلەڭ ۇرپاعىن قولداۋ. 2023 جىلعى 20 قىركۇيەكتە ءماجىلىس قابىلداعان زاڭ پارلامەنت سەناتىنىڭ قاراۋىنا جىبەرىلدى. سەنات 13 قازاندا زاڭدى قايتاردى جانە قۇجاتقا 10 تۇزەتۋ ەنگىزىلدى. ونىڭ ىشىندە 5 تۇزەتۋ رەداكسيالىق-ناقتىلاۋ سيپاتىندا، ال قالعان بەسەۋى زاڭنىڭ جەكەلەگەن نورمالارىن زاڭنامالىق اكتىلەرگە سايكەس كەلتىرۋدى كوزدەيدى. اتاپ ايتقاندا، ماقساتتى جيناقتاۋدا ءبىرىڭعاي زەينەتاقى قورىنداعى شوتتارعا اۋدارا وتىرىپ، ەكىنشى دەڭگەيلى بانكتەردە، ۇلتتىق پوشتا وپەراتورىندا اشىلعان بانك شوتىنان اۋدارۋدى رەتتەيتىن نورمالارداعى دوللاردى تەڭگەگە ايىرباستاۋ «اۋدارىم كۇنىنە» ەمەس، «اۋدارىم ساتىنە» دەپ وزگەرتىلدى. سونىمەن قاتار، «ق ر تۇڭعىش پرەزيدەنتى – ەلباسى تۋرالى» كونستيتۋسيالىق زاڭنىڭ قولدانىلۋى توقتاتىلۋىنا بايلانىستى تەرمينولوگيالىق بىرىزدەندىرۋ ءۇشىن «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭىنا تۇزەتۋ ەنگىزىلدى. سەنات ەنگىزگەن تۇزەتۋلەر زاڭنىڭ تۇجىرىمدامالىق ەرەجەلەرىن وزگەرتپەيدى. جوعارىدا ايتىلعانداردى ەسكەرە وتىرىپ، ءماجىلىس كوميتەتى سەناتىنىڭ وزگەرىستەرىمەن جانە تولىقتىرۋىمەن كەلىسۋدى ۇسىنادى»، - دەدى ءماجىلىس دەپۋتاتى بەرىك بەيسەنعالييەۆ.
جالپى وتىرىس بارىسىندا پالاتا دەپۋتاتتارى سەنات ەنگىزگەن تۇزەتۋلەرمەن كەلىستى.
اتاپ ايتقاندا، مەملەكەت باسشىسى 2022 جىلعى 1 قىركۇيەكتەگى قازاقستان حالقىنا ارناعان جولداۋىندا «ۇلتتىق قور – بالالارعا» اتتى جوبانى ىسكە اسىرۋدى ۇسىندى. بۇل جوبا - وسكەلەڭ ۇرپاقتىڭ ەرەسەك ومىرگە ناقتى جولداما الۋىنا باعىتتالعان العاشقى قادام. ءقازىر رەسمي دەرەكتەر بويىنشا ەلىمىزدە 18 جاسقا دەيىنگى بالالاردىڭ جالپى سانى شامامەن 6،7 ملن ادامدى قۇراپ وتىر. زاڭعا سايكەس ۇلتتىق قوردىڭ ينۆەستيسيالىق تابىسىنىڭ 50 پايىزىن 18 جاسقا دەيىنگى بارلىق جاستاعى بالالار اراسىندا تەڭ ءبولۋ كوزدەلگەن. ۇلتتىق قور قاراجاتى ءبىلىم الۋعا جانە تۇرعىن ءۇي جاعدايىن جاقسارتۋعا باعىتتالعان ناقتى ەكى ماقساتتا پايدالانىلادى.
بۇدان بۇرىن حابارلانعانداي، بيىل 12 قازاندا سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇلتتىق قوردان بالالارعا ارنالعان قاراجاتتى ەسەپتەۋ، تولەۋ جانە پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جەكەلەگەن باپتارى ماقۇلدانبادى. بۇل رەتتە، اتالعان باپتاردىڭ جاڭا رەداكسياسىن ۇسىنا وتىرىپ، قۇجات ماجىلىسكە قايتارىلعان ەدى.
بۇل تۇرعىدا زاڭنىڭ كەيبىر ەرەجەلەرىن ءىشىنارا سايكەستەندىرۋ ەسكەرىلگەن. مۇنىمەن قوسا، ۇلتتىق ءال-اۋقات قورىنىڭ جالعىز اكسيونەرىنىڭ قۇزىرەتىن رەگلامەنتتەيتىن قايتالاناتىن نورمالاردى الىپ تاستاۋ قاراستىرىلدى. «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» كونستيتۋسيالىق زاڭنىڭ قولدانىلۋى توقتاتىلۋىنا بايلانىستى «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭنىڭ نورمالارىنا سايكەس كەلتىرۋ قامتىلعان. بانكتەر مەن سالىمشىلار اراسىندا داۋلى جاعدايلاردىڭ تۋىنداۋ تاۋەكەلدەرىن بولدىرماۋ ماقساتىندا پايدالانىلماعان نىسانالى جيناقتاردى تولەۋ قاراجاتىن بانكتىك شوتتاردان بجزق شوتتارىنا اقش دوللارىمەن اۋدارۋ كەزىندە «اۋدارىم كۇنىنە» ەمەس، «اۋدارىم ساتىنە» تەڭگەمەن ايىرباستاۋ ەسكەرىلگەن.